Kisah Para Rasul 2:12-38

¹²Ing emangpi taninggar, senge ini nu-nut itadangtaaning hula, “Etatalang ba ening aulang, ee? Evengbanang hula naba ba angu?”

¹³Aarunge nehe iiba angu ijajahi ening. Nehe ang naung hula, “Ee! Ekang iuuling ekang! Se ing angu, naboa ba ue!”

¹⁴Angmi angu Petrus bot Mutu Yesus Eetvala aabeung arinu belta nu angu di ue. Angmuse, ana tahit nehe toang ba ue ang mi taing vengkumpul angu iat mateng. Ana amal aeelet iat hubai hula, “Nimang iimal, niva iimal, bot nekaku naung! Ing ba Yahudi enehe, bot iing ba hoa bendar Yerusalem anga mi mihi! Iiavel helet aaung-aaung senge ne mateng anga vengmee, se na hula hur aaung-hama metma iing emangpi veng iiat hubai.

¹⁵Iini ekang vengiiomit hula nehe anga naung ue naboa ekang. Bae aulang niang! Vengani, se nehe iiba bae kukuaveng naboa niang. Se anga uhavede oda turinu!

¹⁶Iini vengmee se nehe anga naung iihur ba nu-nut metma itat mateng. Emolo angu alang: Uanguveng, Lahatala Ana Ehurvala Yoel Aing metma na anga vengbanang iilat, hula:

¹⁷ꞌLahatala vengbanang hula, “Eningse ved evengseng muse, Na Ne Roh angu bokong metma nehe emangpi enang, Iioal mehal bot iioal jangu ang naung, eningse Na metma Ne etvala ening. Iinehe kuar ang naung, eningse naba ba Na metma itubing angu ini uuling ateing. Bot iinehe boma ang naung, eningse naba ba Na hula metma itubing angu ini vengiipal.

¹⁸Ila ved hula evengseng angumi se, Ne malea ang naung Na Ne Roh metma ma inang. Na metma mehal di emangpi enang, Bot Na metma jangu di emangpi enang. Naba ba Na metma iat hubai angu eningse ini vengmateng.

¹⁹Eningse Lahatala Eved hoa. Aarunge ved angu bae hoa jedung se, ematurat Na na muraniang ang naung ening doe atelat burang mi. Na mura niang emenghula ved aamina edadenang; bot uuru di tenat emenghula ve edadenang. Na bot na emangpi ba mura niang angu por alolang anga taang ening. Na angu naung, emenghula ve, bot aad edadenang, ehara tutung bot ebanak di ava apaleteng emenghula bano edadenang. Eningse Lahatala Eved eele ba mura niang angumi se, nehe ba Lahatala Abanang etatabit ot ioang moling, angu ba Lahatala Ana ing ening lohi.ꞌ ” Aing angu, ba turangmi Yoel vengbanang iila.

²²Nekaku naung iing ba Israel enehe! Iavel hele senge naba ba na hula vengbanang anga vengmee. Lahatala Ana Yesus Nasaret enehe angu matubing iila. Ni ateing iilat hula, angu etabi, se Lahatala Ana Ekavasa metma Yesus enang Ana na mura niang ening ni uuling nieng taang ateing iila. Iing di na anga uuling ateing iila, se Yesus Ana iihahama mi na mura niang ang naung ening iila.

²³Aarunge iini Aing ening Ana aamina. Nehe jasi ang naung iimampi hama-hama Aing metma leut vengpaku. Emangpi ba iini ening metma Yesus adana angu, turang jamang mi Lahatala vengbanang iila, se etabit Eomi eamulung angu ebele.

²⁴Iini ening aulang senge Ana etatabit vengaamina. Aarunge Lahatala bae vengkilang Yesus aaminat milalu niang. Se, Lahatala Ana Aing vengahit metma aaminang ekavasa angu eahalang, bot Lahatala Aing ening bale aabeta. Se aaminang ekavasa bae Aing vengtahang niang angu ebele.

²⁵Turang jamang mi raja Daud ana hurak iilat metma Yesus adana angu hula alang: ꞌNa ateing se Lahatala kilang ue nat toang pina, angu ebele na nu bae bisat nabaang jadi niang, se Lahatala kilang ue naing veng.

²⁶Angu ebele nomi mang eele; base na Aing tajaning Aing palevang, bot na kilang Aing anguba ading.

²⁷Ana bae noramana vengkilang nehe aamina ang naung imana mimihi niang. Bot Lahatala bae Enehe Hamulang ebaring angu vengkilang daang omimi manisa niang.

²⁸Aabetang evia emamolo angu Lahatala metma netubing iila. Angu ebele nomi mang eele, se, Lahatala ue nat toang pina angu ebele.ꞌ Anguba turang mi raja Daud hurak iila.

²⁹Nekaku naung neserang naung! Angase naba ba, metma boma Daud adana angu na metma iiat mateng tarang. Raja Daud angu aamina tila, bot aing taloul iila. Edaang angu jedung ue pi hahama mi hoa vede ved anga venghili.

³⁰Raja Daud angu di, Lahatala Ehurvala ba nu. Bot ana ateing se, Lahatala Ana at palai tila hula, etabaning angu nu eningse parenta pina, aing angu Nehe ba turangmi Lahatala matubing iila.

³¹Uanguveng, Daud ana naba ba ue apang oat hoa sehi angu euuling. Bot metma Nehe ba Lahatala Ana vengpalai tila hula gahing hoa adana di ematurat Daud ana vengbanang. Eningse Nehe angu aamina, aarunge Ana bot bale aabeta. Bot Daud di vengbanang hula Nehe angu Lahatala bae vengkilang nehe aamina ang naung imana mi mihi niang, bot Ebaring angu di bae manisa niang.

³²Nehe ba Daud vengbanang angu, benang ba Yesus angu! Eamina omimi angu Lahatala Aing ening bale aabeta tila, bot Ebale aabeta angu ni uuling nieng taang ateing iila!

³³Bot angase Lahatala Ana Yesus Aing ohi senge pangka mieele-mibalolu angu pina tila. Angu ebele Ana doe mana ba Lahatala vengharaka tila angu mi mihi. Bot Imang ERoh Hamulang angu, Imang metma ma Enang iila, turang mi Lahatala palai tila angu eamulung. Angu ebele Yesus Ana ERoh Hamulang angu, metma ping di mapinang. Base, vede anga iini vengmee bot iini uuling ateing iila se, Lahatala Ana ERoh metma maninang iila angu ebele.

³⁴Daud bae sorga mi mida niang, aarunge ana hurak hula, ꞌLahatala Ana ne Manaing angu At mateng hula, “Aana Netene oa angmi mana ba Na vengharaka tila angumi mihi,

³⁵sampe Na ening nehe ba omi metma Eekakurang ang naung emangpi iora vengholong bot Aaing vengtou.ꞌ ”

³⁶Angu ebele Israel enehe ang naung emangpi malekang ateing hula Yesus ba iini metma leut vengpaku ening aamina angu, Aingba Kristus, Nehe ba turang mi Lahatala Ana vengpalai hula gahing hoa angu. Bot Aingba piManaing Eele-balolu!”

³⁷Vengmeet aulang muse, nehe ang naung iomi etatabit bae sanang niang. Angmuse ini Petrus bot etvala aabeung ang naung iadangtaaning hula, “Kaku naung! Ni malekang naba ba ening hengi?”

³⁸Angmuse Petrus ibalet hula, “Iini malekang iiava vengbaroti, sengila ba bale Lahatala amulung. Iini malekang hoa senge nehe jar metma iing sarani hengi, aulange matubing hula, iini bot bale Yesus Kristus Evia aabetang angu eamulung iila. Angu di bot matubing hula, iiahalang ang naung Lahatala vengahi tila. Sengiila ba Lahatala Ana ERoh Hamulang angu metma maiinang.