Asá yerewí Uni 2:12-38

¹²Ŋunde yero soso yukuwaŋgurí, ko newondeye uroní epe mito-mito taŋgurí, “O itaka tunoqete ŋuko, do murí ka?”

¹³Quko kumimbo huwó mande ŋande yaŋgurí, “Uni ŋu wain parámi nero kape-kape teteŋgo.”

¹⁴Asa Pita otoqoro asá yerewí uni 11 ŋuya kaŋero kondé nekoro unipare ŋande yimiraró, “Ye Juda uni, ko ye soso Yerusalem yoteŋgo qu, o tunoqiní qeneteŋgo ŋuro murí rondaqe yunowe teteno. Kusumbo re mandene iŋi.

¹⁵Yembe uni ŋambe wain koro kape-kape teteŋgo yero, hamómbe? Ŋu kini. Itaka ita saraŋoní 9 kilok naŋge.

¹⁶Kini, o itaka tunoqete ŋaro, komo ye-ye uni ŋu Joel ŋundo ŋuro ŋande yaró,

¹⁷“‘Anutuko ŋande yete, “Naru weŋa qunoko neneŋo Yuqane windoroŋowe unipare soso saŋayemo uweya. Ŋunde tewe yeŋo nambo-simóyembo Anutu koro mandí yesowowaŋgo, yeŋo simó keta-keta ŋundoko o enesó-enesó qenewaŋgo, yeŋo uni pará-pará ŋundoko o quko qenewaŋgo.

¹⁸Ŋu naruko ŋunoko no Yuqane windoroŋowe sunará simónemo, sunará parenemo ŋuro saŋayemo uweya. Ŋunde tewe Anutu koro mandí yesowowaŋgo.

¹⁹Nondo o amana-mana siyowe koporéko tunoqewaŋgo. Nokono amu noŋgo rokó kate-kate siyowe tunoqewaŋgo. Sitú koya te qayote quya pukatutu parámi horé ŋuya tunoqewaŋgo.

²⁰Uni Parámimboro naru parámi horé mu tukuni tiníqo kosako huriri qembe tunoqeweya, ko komboko mandumi sitú qembe tunoqeweya.

²¹Ko Uni Parámimbo unipare soso owí nekoteŋgo ŋu rambaruru koŋgo yoreweya.”’

²²“Ye Israel uni, mande ŋa iŋoyi. No Yesu, Nasaret noŋgo uni ŋuro yimiroteno. Ye ŋande iŋoteŋgo, ko Anutuko uni ŋuwore o wimbí moré enesó-enesó ye keweroyemo tero uni ŋuro owí hokaró.

²³Komo suki Anutuko iŋoro mande kusiyaró, ko itaka uni ŋu re yeŋo kandeyemo rotoní uni hutuŋo mandenani kama howeyoteŋgo quro kandeyembo tipiririko uri khumaró.

²⁴Ŋunde quko Anutuko khumo koro wimbí ŋu re rotoro okokowoní pitu ko otoqaró. Dokoro uni tapu ŋundo ŋu towowero mepémo kini.

²⁵Hamó, Dewitko ŋuya ŋuro ŋande yaró, “‘Nondo Uni Parámi qenewe taŋgenemo suki yote. Asa ko kandene kondésina yoníqo oka kato yuku nerewero mepémo kini.

²⁶Ŋu murí ŋuro newondenembo meté yoweya, maŋgonembo niŋgu-niŋgu mande yeweya. Hamó, neneŋombo o meté horé ŋuro sopowano.

²⁷Dokoro keto noroti uni khumowí ŋuro yendéyemo ŋuno kama yowano, keŋo uni meté horé ŋu roti uni tapuko ŋuno kama puqeweya.

²⁸Yoto-yoto koro khe qu witú nereró, nori toŋeŋgemo niŋgu-niŋgu parámi tewano.’

²⁹“Uni topo, no hamó iŋoro meté yimirowe teteno, ko usinani Dewit ŋundo mande ŋu nakayáŋaró, quko komo khumoní re tapuŋaŋgurí. Ko eneŋo tapuyó nore keweronanimo itaka yote.

³⁰Dewit ŋuko ye-ye uni ka tunoqaró. Ŋunde ŋuroko komo Anutuko mande hamó ka ŋande miraró, ko imemoŋgo Dewit koro sowe qu kato eneŋo yakutímo kunditero unipare wiri yereweya. Asa mande ŋu iŋoro

³¹Kristo ŋundo pitu ko otoqoweya ŋuro ŋande yaró, ko Anutuko rotoní uni khumowí ŋuro yendéyemo ŋuno kama yoweya, kowí ŋu kama puqeweya.

³²Yesu ŋuko, Anutuko okokowoní otoqaró ŋu. Nore ŋano qundo soso qenero ŋuro yesowoyoteto.

³³Komo Anutuko Yuqa Surumí nore nunoweya ŋuro mande kusiyaró. Asa pitu ko otoqoníqo, Anutuko riní koreko horé oro Anutu koro kandí kondésina kunditero Awa kandí moŋgo Yuqa ŋu rero windoroŋoní ye o enesó ŋa qenero iŋoyoteŋgo.

³⁴Qeni, Dewit eneŋombo samboko kama oró. Quko ŋande yaró, “‘Uni Parámimbo uni parámine ŋande miraró, “Kandene kondésina ŋano kunditekata,

³⁵yate-yate saŋgiríŋge yorewe kheŋge kusuŋoyómo yowaŋgo.”’

³⁶“Ŋunde ŋuro ye Israel koro sowe qu, ye meté iŋoyi. Yendo Yesu rero tipiririko uraŋgurí ŋuko, Anutuko riní Uni Parámi yote; ko Kristo ŋunde yote.”

³⁷Pitako ŋunde yiní mande ŋundo uniparetoro newondeye hamó saŋgawoní unipareto Pita koya uni asá yerewí unindoya ŋande osese yereŋgurí, “Uni topo, nore do ka tewato?”

³⁸Pitako ŋande yimiraró, “Ye kanata-kanata quhuríyemboro newonde surumí teya quhurí ŋu se rotoya Yesu Kristo owímo sono ri. Ŋunde tiqota Anutuko quhuríye se rotoro Yuqa Surumí rero yunoweya.