Kejadian 25

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

37

38

39

40

41

42

43

44

45

46

47

48

49

50

¹Abraham ana bot taang jangu nu medit metma ejangu ening, ene Ketura.

²Ketura ana vaal vengajait metma Abraham enang angu, iene benangba: Simram, Yoksan, Medan, Midian, Isbak, bot Sua.

³Yoksan oal benangba; Seba, bot Dedan. Dedan etabaning ba; Asyur enehe ang naung, Letus enehe ang naung, bot Leum enehe ang naung.

⁴Midian oal naung benangba; Efa, Efer, Henok, Abida, bot Eldaa. Ing emangpi angu, Ketura etabaning.

⁵Abraham jedung aabeta sehi angu, ana epasaka ang naung emangpi metma oal Isak enang iila. Aarunge ejangu Hagar, bot Ketura oleve ioal ang naung, Abraham ana atangoang ba paul metma nu-nut inang, senge metma ipasaka ening. Seng angmuse ana ing gahing iot tahit lamal Isak eahalang ila Kanaan eved danangoa angmi mihi, senge ini Isak eola.

⁷Abraham euumur mitung 175 muse, ana aamina. Uanguveng ana aamina angu, ana etatabit boma tila, bot oong di etatabit bala tila.

⁹Angmuse oal Isak, bot Ismael oleve aing metma Makpela epa ba, Mamre abung angu, mi taloul. Pa angu, turangmi Abraham ana Het aabang enehe nu ene Sohar angu, oal ene Efron angu abung beli tila. Tura Abraham ejangu Sara di, ini aing metma pa angu mi taloul.

¹¹Abraham ana aamina tila muse, Lahatala Ana Eaaung-Ehama ba bae ebale veng niang angu metma oal Isak enang, angu ebele Isak ana aabetat tening-rama. Bot Isak ana jar eng Lahai Roi angu, abung mihi.

¹²Angaba Ismael esarenta. Ismael angu, Abraham bot ejangu gariang ene Hagar angu oleve ioal. Hagar angu, Sara emalea. Masir enehe.

¹³Ismael oal mehal angu, inang arinu belta aalu. Anga iene ba mitamulung, mutu sampe iia, benangba; Nebayot, Kedar, Abdel, Mibsam, Misma, Duma, Masa, Hadad, Tema, Yetur, Nafis, bot Kedma. Ismael oal mehal ang naung, ing metma bangsa arinu belta aalu eidat-imang ening. Nu-nut eaabang veng. Bot ini nu-nut iaabang angu ene maveng, iene angu eamulung.

¹⁷Ismael euumur mitung 137 muse, ana aamina.

¹⁸Aarunge etabaning ang naung, emangpi bae itat sanang niang. Angu ebele ini tarae-teapahing mihi, mulai Hawila mi sampe ila Syur ba Masir abung angu mi.

¹⁹Anga Isak Abraham oal angu esarenta. Abraham ba Isak aing vengajai.

²⁰Isak euumur mitung ari buta muse, ana Ribka Betuel oal, Laban ekaku jangu ba Padan Aram mi angu, medit metma ejangu ening.

²¹Isak ana sambajang LAHATALA Abanang, metma ejangu Ribka adana, se Ribka atou pamar-jasi angu ebele. Lahatala ana Isak ebanang angu akanap muse, ejangu Ribka ana atou veng.

²²Aarunge vaal aaru ba Ribka ana vengtoda, base vaal ang naung ini Ribka atou mi tatatobang alolang-niang. Angmuse Ribka ana mateng hula, “Kalo vaal aaru alang se, tatalang senge na bisa aabeta?” Angmuse Ribka ana Lahatala Abanang, senge Lahatala ana via metma etubing.

²³Lahatala ana Ribka at mateng hula, “Bangsa aaru ba eningse toang-tahit alolang-niang angu, ue aatou mi. Bangsa nu angu eningse lebe midaeri, bangsa nu angu mi ataangoa. Eningse vaal ba iia angu lebe midaeri, vaal mutu angu mi ataang oa. Bot vaal ba mutu angu eningse metma vaal iia angu emalea ening.”

²⁴Base, ejol mi tila muse, Ribka ana vaal mehal aaru takohal vengajai.

²⁵Vaal ba mutu angu kaluar se, ehul angu tena, bot eboa angu emangpi eamudi veng, emenghula kondo eamudi veng angu edadenang. Angu ebele ini vaal angu ene maveng hula, Esau, (evengbanang tarang se hula, ꞌeamudi vengꞌ.

²⁶Seng angmuse ekaku iia angu kaluar. Aarunge atang angu ana metma ekaku mutu Esau ekudavali angu vengpina. Angu ebele ini vaal angu ene maveng hula, Yakob, (evengbanang tarang se hula, ꞌkudavaliꞌ. Uanguveng Esau bot Yakob oleve ing vengajai angu, Isak euumur mitung 60.

²⁷Angmuse Esau, bot Yakob oleve taang aaele-aaele. Esau ekarajang ba binanta vengkori. Bot ana sukat banaha mi mihi. Aarunge Yakob angu papaumang, bot ana sukat hava ba mi mihi.

²⁸Isak ana sukat binanta banaha mi angu euumung adang. Angu ebele ana omi metma Esau ejahit milebe. Aarunge Ribka aing omi metma Yakob ejahit milebe.

²⁹Ved nu adana, Esau ana uhavede dadi mi binanta vengkori ba hoa se, Yakob ana taur doa sehi. Esau etatabit lusu, bot etatabit malapal.

³⁰Angu ebele Esau ana Yakob at hubait hula, “Kaku! Eetaur tena ba aana doa angu, kabingdena metma manenang, senge na adang hengi! Na etatabit malapal anga.” (Angu ebele ini Esau earut hula, Edom, evengbanang tarang se hula, ꞌtenaꞌ.)

³¹Angmuse Yakob ana Esau ehur angu ebalet hula, “Kaku, na vengjali! Aarunge eemutu angu aana malekang metma manenang hengi.

³²Esau ana Yakob ehur angu ebalet hula, “Nemutu angu egunang naba! Aaungba aana medi, senge taur tena angu uuser ohit manenang na adang. Misabantar se, na malapal aamina.”

³³Aarunge Yakob ana ekaku Esau at mateng hula, “Kaku! Aana malekang nat sumpat hula, eemutu angu aana metma manenang iila hengi.” Angmuse Esau ana Yakob at sumpa, bot ana emutu angu ohit metma Yakob enang.

³⁴Seng angmuse Yakob ana taur tena angu bot roti veng metma Esau enang. Esau ana adang sengmuse, ana tahit lamal. Esau ana vengomit hula, emutu angu bae egunang veng niang. Angu ebele ana ening aulang.