Kap 73:1-21

¹Asap dakon kap kɨnda. Piŋkop da Israel amɨn do yo tagɨsi aŋ yomɨsak. Piŋkop da butnigwan yoni mɨnisi amɨn do yo tagɨsi yomɨsak.

²Mani nak da naga yokwikon palɨ magɨm. Nak kandapno sagalek yaŋ nɨkban maŋek nandaŋ gadatno palɨ yɨpmaŋ dekgɨm.

³Nido, nak kwen wugɨk amɨn yokwi pakpak uŋun pɨndakgo yoni morapmɨsi aŋakwa uŋun dakon yoni do pɨndak galaktok agɨm.

⁴Gɨptɨmnikon tepmɨ dɨma nandaŋ. Uŋun amɨn tebai ae gɨptɨmni uŋun tagɨsi gɨn.

⁵Jɨgɨ amɨn dɨwarɨ da paŋ uŋudeŋ dɨma paŋ. Amɨn dɨwarɨ jɨgɨ mibɨlɨ mibɨlɨ paŋ, mani yo uŋuden dɨ dɨma noman taŋ yomaŋ.

⁶Do iyɨ do nandaba wɨgakwa kɨsɨk kɨsɨk aŋ, ae nomansi amɨn dɨwarɨ dapmaŋek paŋupbal aŋ.

⁷Uŋun but nandak nandaknikon da aŋpak yokwi ak do nandaŋ uŋun paŋalon aŋ.

⁸Amɨn dɨwarɨ do manji gen yaŋ yomɨŋek yokwi aŋ yom do gen yoŋ. Uŋun kwen wugɨksi aŋek amɨn dɨwarɨ paŋupbal ak do gen madepsi yoŋ.

⁹Piŋkop Kwen Kokup egɨsak uŋun do gen yokwi yaŋ ɨmaŋ. Aŋek iyɨ dakon man pawɨgek amɨn morap da geni guramɨtni do pi tebaisi aŋ kɨmokgoŋ.

¹⁰Do Piŋkop dakon mɨŋat amɨnyo dɨwarɨ kwen wɨgɨk amɨn dakon gen do galak taŋek geni uŋun nandaŋ gadaŋ.

¹¹Amɨn yokwi da gen yaŋ yoŋ, “Piŋkop da yo nin da amaŋ uŋun arɨpmɨ dɨma nandɨsak. Piŋkop Wukwisi da nin dakon aŋpaknin dakon mibɨlɨ nandɨsak dakon kosit kɨnda dɨma tosok.”

¹²Amɨn yokwi uŋun jɨgɨ dɨ dɨma noman taŋ yomaŋ. Aŋakwa yoni morapmɨsi, ae sigɨn ɨreŋ toŋ.

¹³Nak naga dakon egɨp egɨpno kɨla tebaisi agɨm, ae butno gwaljɨgɨ mɨni tosok, ae yokwi dɨ dɨma agɨm. Uŋun ɨsal dogɨn agɨm, ma?

¹⁴Piŋkop, nak yokwi dɨma agɨm, mani gak da gɨldat kɨnda kaloŋ gɨp tedep namɨsal, ae wɨsa dagokdo morap kobogɨ yokwisi namɨsal.

¹⁵Nak gak dakon mɨŋat amɨnyogo do amɨn yokwi da gen yoŋ uŋudeŋ yoyɨgɨm tam, top yoyɨkom.

¹⁶Nak amɨn yokwi da yo uŋun aŋ dakon mibɨlɨ wɨsɨŋ kok do agɨm, mani aŋtɨdok agɨm.

¹⁷Piŋkop, nak gak da telagɨ yutnon wɨgɨgɨm bɨsapmon nandak nandakno pɨsagɨt. Aŋek amɨn yokwikon yo noman tokdaŋ uŋun do nandako pɨsagɨt.

¹⁸Piŋkop, gak da amɨn yokwi abɨ kosit sagalegɨsi baŋ akwaŋ, aŋek abɨ maŋek wagɨlsi tasɨk toŋ.

¹⁹Uŋun tepmɨsi tasɨk toŋ. Ae kɨmotni uŋun pasol pasolɨsi ae yokwisi.

²⁰Amɨn Tagɨ, uŋun amɨn da dɨpmɨn pɨndakgaŋ da wɨsa dagaŋakwan pasɨlgaŋ uŋun yombem. Gak da abɨŋaki amɨn yokwi pasɨl mudoni.

²¹Uŋun bɨsapmon nak bupmɨsi nandagɨm, aŋek butnokon da yokwisi nandagɨm.