Kap 71:11-17

¹¹Uŋun yaŋ yoŋ, “Kɨlɨ yolek abɨdono. Uŋun aŋpulugosak amɨn kɨnda dɨma egɨsak. Piŋkop kɨlɨ yɨpmaŋ dekgɨt.”

¹²Piŋkop, dubagɨkon dɨma egɨpbi. Piŋkopno, tepmɨsi abɨŋek nak aŋpulugoki.

¹³Gen yaŋ namaŋ amɨn uŋun pabɨŋ yopmaŋek dapbɨ pasɨlni. Nak aŋupbal ak do nandaŋ, do gak da paŋɨŋtok aŋek madepsi paŋmayak abi dosi nandɨsat.

¹⁴Mani nak toktogɨsi gak nandaŋ gadaŋ gamɨŋek aŋpulugoki do jomjom abeŋ. Mango madepsi sigɨn awɨgɨkeŋ.

¹⁵Aŋpakgo kɨlegɨsi uŋun do amɨn yoyɨkeŋ. Yo masɨ masɨmɨ morapmɨsi nagon agɨl uŋun arɨpmɨ dɨma manjɨŋ mudogɨ, do gɨldat kɨnda kaloŋ gak do nandaŋ egek pulugaŋ nepgul uŋun dakon geni amɨn yoyɨkeŋ.

¹⁶Amɨn Tagɨ Yawe, gak dakon tapmɨm do nandaŋek gak aŋkɨsikeŋ. “Yawe kaloŋ gɨn uŋun amɨn kɨlegɨsi” yaŋ yoyɨŋ teŋteŋokeŋ.

¹⁷Piŋkop, nak monɨŋɨsogon da gak da nayɨŋ dek aŋaŋ wɨgɨl. Gak da yo masɨ masɨmɨsi asal uŋun do amɨn yoyɨŋ teŋteŋosot.