Kap 68:6-32

⁶Ae mɨŋat amɨnyo dage dage aŋek ekwaŋ uŋun dɨwatni paŋalon aŋyoban tagɨsi yɨkgaŋ. Ae dam tebanon ekwaŋ amɨn pulugaŋban kokupmon tagɨsi ekwaŋ. Mani kwen wugɨk aŋ amɨn mɨktɨm kɨbɨrɨ tɨm yokwisikon paŋkɨ egɨpdaŋ.

⁷Piŋkop, kalɨp gak mɨŋat amɨnyogo mibɨltaŋ yomɨŋek mɨktɨm amɨn da arɨpmɨ dɨma egɨpmɨ tɨmon tɨmɨk pawɨlgɨl.

⁸Uŋun bɨsapmon Sinai dakon Piŋkop abɨŋakwan mɨktɨm wudɨp agɨt. Asi, Israel dakon Piŋkop abɨŋakwan sɨkak madepsi magɨt.

⁹Piŋkop, gak da sɨkak madepsi yɨpbɨ mɨktɨmgokon magɨt. Aŋaki mɨktɨm yokwi da mɨktɨm tagɨsi ae dagagɨt.

¹⁰Uŋun mɨktɨmon mɨŋat amɨn kabɨgo da kokup wasawit. Gak yogo morapmɨsi uŋun baŋ wadak wadak amɨn paŋpulugaŋaki tagɨsi egɨpgwit.

¹¹Amɨn Tagɨ da mɨŋat amɨni do gen yomgut, aban mɨŋat morapmɨ da kɨŋ gen uŋun yaŋ teŋteŋawit.

¹²Gen uŋun yaŋ, Uwal dakon kɨla amɨn madep gat ae emat amɨn morapni gat kɨsi pasal kwaŋ. Aŋakwa mɨŋat kokupmon ekwaŋ da amɨn emaron yo tɨmɨkgaŋ uŋun kokwin aŋ.

¹³Mɨŋat uŋun sipsip kɨla aŋ, mani silwa gat gol gat baŋ gɨptɨmni tagɨsisi paŋtɨlɨm aŋek mɨnam dakon tɨlɨmɨ yombem dagoŋ.

¹⁴Piŋkop Tapmɨm Ami da Salmon Kabapmon kɨla amɨn madep yolban kɨwit, aŋek uŋun kabapmon ais yopban mawit.

¹⁵Basan dakon kabap uŋun madepsi. Ɨleŋ monɨŋ monɨŋni morapmɨsi.

¹⁶Kabap madep Basan, gak nido Piŋkop da Jerusalem dakon kabap Saion uŋudon iyɨ yɨt do tɨlak agɨt uŋun do nandabɨ yokwi tok asal? Yawe iyɨ toktogɨ uŋun kabapmon egɨpdɨsak.

¹⁷Amɨn Tagɨ emat amɨni gat os da emat amɨn ɨlɨk pawɨlgaŋ tamo tausen morapmɨ kon da apgut. Sinai Kabap yɨpmaŋek pɨgɨt da iyɨ da telagɨ yutnon egɨsak.

¹⁸Piŋkop kabap dubagɨsikon wɨgek uwalni morapmɨ emaron teban taŋek iyɨ tɨmɨkgɨt uŋun amɨn tɨmɨkban kɨsi wɨgɨwit. Uŋun kwen wɨgɨk amɨn uŋun dakon yoni baŋ but galak do tɨmɨkgɨt. Piŋkop Yawe iyɨ uŋun kabapmon egɨpdɨsak.

¹⁹Amɨn Tagɨ dakon man awɨgɨno. Gɨldarɨ gɨldarɨ nin dakon jɨgɨ ɨmekdak. Piŋkop kaloŋ dagɨn nin yokwikon baŋ tɨmɨkdak.

²⁰Piŋkopnin da nin paŋpulugaŋakwan tagɨsi ekwamaŋ. Amɨn Tagɨ Yawenin da nin paŋpulugaŋakwan dɨma kɨmokgomaŋ.

²¹Mani Piŋkop da uwalni dakon busuŋni paŋsulɨtdɨsak. Uŋun aŋpak yokwi toktogɨsi aŋ amɨn paŋtasɨk akdɨsak.

²²Amɨn Tagɨ da yaŋ yosok, “Nak da uwalji Basan ekwaŋ uŋun aeno tɨmɨk paŋapdɨsat. Tap ɨdap da kadagɨkonsi baŋ tɨmɨk pawɨkeŋ.

²³Ji uwalji dakon yawi baŋ kandapji sugokdaŋ. Aŋakwa pɨŋanji da galak toknikon nokdaŋ.”

²⁴Piŋkopno, ae Kɨla Amɨn Madepno, mɨŋat amɨn morap da gandaba gak emaron teban tal da kɨsɨk kɨsɨk aŋek abɨsal. Kɨsi morap da gandaŋakwa telagɨ yutgogwan wɨgɨsal.

²⁵Kap yogok amɨn mibɨltok kwaŋ, aŋakwa dubaŋ tɨdok amɨn buŋon obaŋ. Aŋakwa mɨŋatjok tambarin tɨdoŋ uŋun binapmon kwaŋ.

²⁶Uŋun kap yaŋ yoŋ, “Nin Piŋkop dakon mɨŋat amɨnyo, nin muwugek Piŋkop dakon man awɨgɨno. Israel amɨn, nin Yawe dakon man awɨgɨno.”

²⁷Benjamin dakon mɨŋat amɨnyo kaloŋɨsok da mibɨltok kwaŋ. Ae Juda amɨn dakon kɨla amɨn gat ae mɨŋat amɨnyo gat Benjamin dakon amɨn kabɨ baŋ yolgaŋ. Aŋakwa Sebulan gat Naptali gat dakon kɨla amɨn buŋon yolgaŋ.

²⁸Piŋkop, gak tapmɨmgo kalɨp nolɨgɨl, uŋun naŋ abɨsok nomansi nolɨki.

²⁹Kɨla amɨn madep da yutgo Jerusalem tosok uŋudon abɨŋek gak do but galak do yo paŋabaŋ.

³⁰Piŋkop, Isip uŋun joŋ kɨlap yokwi yombem, uŋun tebaisi iyɨki. Gak da uwalnin morap kwen wɨgɨk aŋ uŋun tebaisi yoyɨki. Tebai yoyɨŋaki wɨgɨ ŋwakbeŋ aŋek silwa gamni dakon bɨsapmon wugɨsak. Emat ak do nandaŋ amɨn yolbɨ dukwan dukwan kɨni.

³¹Isip amɨn da but galak dakon yo tɨmɨgek Jerusalem opdaŋ. Aŋakwa Itopia amɨn da Piŋkop do kɨsitni paŋenagek gawat gawat akdaŋ.

³²Amɨn Ŋwakŋwarɨ Kabɨ, ji Piŋkop do kap yaŋek Amɨn Tagɨ dakon man awɨgɨk do kap yoni.