Kap 52:1-5

¹Kap on kap yoŋ dakon kɨla amɨn do mandabi. Dewit dakon kap kɨnda. On kap do “Maskil” yaŋ yoŋ. Dewit da kap on Idom mɨktɨmon amɨn kɨnda mani Doek uŋun da kɨŋ Sol, “Dewit Aimelek da yutnon kɨk” yaŋ iyɨgɨt bɨsapmon mandagɨt. Amɨn tebai, gak nido Piŋkop dakon mɨŋat amɨnyo do aŋpak yokwi aŋ yomgul uŋun do pɨbɨt tɨdok asal? Bɨsapmɨ bɨsapmɨ Piŋkop da nandaŋ yawot aŋ yomɨsak.

²Gak top amɨn, gengo sɨba geni tepmɨsi yombem geni tepmɨsi da amɨn dɨwarɨ obɨsi mandaŋ yomɨsak. Gɨldarɨ gɨldarɨ amɨn dɨwarɨ paŋupbal ak do nandak nandak asal.

³Gak aŋpak kɨlegɨ do dɨma galak tosol. Aŋpak yokwi dogɨn galak tosol. Gak gen bamɨ yogok do dɨma galak tosol. Top yogok dogɨn galak tosol.

⁴Gak top amɨn. Amɨn dɨwarɨ paŋupbal ak dakon gen dogɨn galak tosol.

⁵Mani nandaki. Piŋkop da gak wagɨlsi aŋupbal akdɨsak. Gak tebaisi abɨdaŋek yutgokon naŋ maban abɨgɨkdɨsal. Aŋek obɨsi gɨkban pasɨlaki mɨktɨmon saŋbeŋek dɨma egɨpbi.