Kap 33:13-22

¹³Yawe uŋun Kwen Kokup da sɨŋtaŋban pɨŋakwan amɨn kɨsisi pɨndakdak.

¹⁴Uŋun kɨla amɨn madep yɨtyɨt tamonikon yɨgek sɨŋtaŋban pɨŋakwan mɨktɨmon amɨn morap pɨndakdak.

¹⁵Uŋun da amɨn dakon but nandak nandakni wasagɨt, do yo morap aŋ uŋun pɨndak nandaŋyo asak.

¹⁶Kɨla amɨn madep kɨnda uŋun emat amɨni morapmɨ da uwalni arɨpmɨ dɨma pabɨŋ yopni. Ae emat amɨn kɨnda uŋun iyɨ da tapmɨmon da uwalni da kɨsiron da arɨpmɨ dɨma pasal kɨsak.

¹⁷Emat dakon os uŋun tapmɨmni madepsi, mani uwal da kɨsiron baŋ arɨpmɨ dɨma paŋpulugosak.

¹⁸Mani amɨn morap Yawe do pasolgoŋ uŋun iyɨ kɨlani asak. Dagok dagogɨ mɨni amɨn do but dasi galak taŋ yomɨsak uŋun do nandaŋek jomjom aŋ amɨn uŋun kɨlani tagɨsi asak.

¹⁹Uŋun amɨn kabɨ paŋpulugaŋakwan dɨma kɨmokgoŋ, ae jap da mɨni aŋ bɨsapmon jap yomaŋakwan dɨma kɨmokgoŋ.

²⁰Yawe uŋun dagɨn nin tagɨ paŋpulugosak, do uŋun do jomjom amaŋ. Uŋun da pasɨknin egakwan uŋun da yoŋgamgwan tagɨsi ekwamaŋ.

²¹Nin mani telagɨ uŋun do nandaŋ dagomaŋ, do kɨsɨk kɨsɨk amaŋ.

²²Yawe, gak nin paŋpulugoki do jomjom amaŋ. Dagok dagogɨ mɨni but dasi galak taŋ nibi dosi nandamaŋ.