1Kenani fwayafwayana namai Aisake i fakwiiya be nenei i viteneyauyauna yota Yakobo i fakwa.
2Eketa Yakobo na natunatuna sifusifufusi nofemaise. Tovanama Yosefa kana manamana 17, sisitawaḡana nukusi sifi keta gouti si kikitavikavinisiya. Sisitawaḡanasima o amana kakawana Binaa keta Dinufa natunatusi, eatu yasi fufunagoyo fasisiyai Yosefa i simanisiya amana nenei.
3Yakobo yana vituveka nenei Yosefa i tufuwa eketa i nuwagabubuwiya nakasina yo muniyai natunatuna namoḡa matatafusi. Na fasinei kana kwame nubwayouna dewabauna i veniya.
4Tovanama sisitawaḡana si kitiya Yosefa kana nuwagabubu nakatamataina yo muniyai tasike, si adibutoyotoyoiya keta muka viunana kana bwaduwai sita nunusifufuwei.
5Nuwabuna tamokaḡa i kavayuna keta tovanama sisitawaḡana kana kavayuna i iyavisiya nenei o naki si dibutoyoḡemokiya.
6Yosefa i iyavisiya i bwaduwa, “Kwa vaneneḡa tu kaku kavayuna a iyaveimi.
7Bagunai witi ta vivikitava eatu yaku kitava i venukanakasiya keta i misiniya. Tovanama nenei yami kitava si misinififiniya yaku kitava keta nenei si koduwa.”
8Eketa sisitawaḡana si iyaviya si bwaduwa, “Oa! Omasi ku vinuwadadana avage venemokena kuna vitufomuwa be kuna visimeikiya?” Noko nenei, Yosefa yana bwadu be kana kavayuna nenei si adibutoyotoyoḡemokiya.
12Tova tamokaḡa Yosefa sisitawaḡana, amasi yana sifi keta yana gouti si visiya keta si niisiya menana Sekemu niniunei, keta nokomai si kitavikavinisiya.
13Eketa Yakobo Yosefa i iyaviya i bwaduwa, “Sisitawaḡau o Sekemu nenei yomuyomu si kitakitavikavina. Nuwanuwaku ana visimeiwa kuna niya nenesiyai.” Yosefa i vinowana i bwaduwa, “Dewadewana, Ana niya.”
14Eketa amana i iyaviya i bwaduwa, “Ku nai be sisitawaḡau ku kitaisi taki yomuyomu nukusi dewadewasi, nao kuna makaviniwa kuna matakawikuwa.” Ebinoni kawanauna nenei Yosefa i visimeiya i niya Sekemu.
15Tovanama i kikinomana, i kakafivinavina kawayavatai atu namoḡa tamokaḡa i nutoniiya i bwaduwa, “Ei, aviyavana ku nunuwasai?”
16Yosefa i nufata i bwaduwa, “Sisitawaḡaku yasi yomuyomu si kitakitavikavina, a nunuwasisiya. Ku sanamanisiya namai kasi tuḡana?”
17Eketa namoḡanama i iyaviya i bwaduwa, “Si nemiya wekamai atu naki si niya. A nowanisiya si bwaduwa si niniya Dotani.” Noko nenei Yosefa sisitawaḡana i muniisiya keta Dotani i nisaisiya.
18Tovanama si kitiya kedawanauwai i nenemiya, kana munuwa fasinei si viwaifufuna.
19Tututausi si vikanunusifusifufuwa keta si sawaviniiya si bwaduwa, “Ake, tokavayuna-onaonanama kwa kitai i nenemiya.
20Ei, ta nuvimatei be tamo yeyenu kokonina nenei ta tewesobuwei. Kana fata amata tana iyaviya avage tamo yomuyomu-wanawanaki i kaniya, ebe tana kitiya taki kana kavayuna ina vivenemokena o muka.”
21Atu Nubeni i nowaniya yasi bwadu eatu i vinuwadadana Yosefa kana guguya fasinei keta i iyavisiya i bwaduwa, “Muka yawasina tana nuyaunei.
22Muka tana nuviufaufai atu nofemai wanakikaoḡowai tata tewesobuwiya yeyenu kokonina nenei.” Nubeni i tanafafafana taina kana guguya fasinei uḡuna nuwanuwana be ina niiya amana nenei.
23Eketa tovanama Yosefa i kikinomana, sisitawaḡana si givikaviniya keta kana kwame nubwayouna dewabauna tofwanei si kakiya.
24Si oviya keta yeyenu kokoninei si tewesobuwiya.
25Tovanama si makavina keta si nuvitoḡa si kakawa atu matasi i kanakasiya keta Isimeni fasekwina si kitisiya si nenemiya na yasi kameni Gineyadiyei, si niniya Itifita. Iba mamadisi nukusi si kivitotoḡa.
26Keta Yuda unaunana i iyavisiya i bwaduwa, “Taki taita tana nuvimatiya keta ufaufana tana tenemakaviuniya, aviyavana tamo kana dewadewana tana nisaḡai?
27Isimeni namoisi nenesiyai ta vitamanei eatu muka tana munuya. Aitevana taina yoke, kita viyo ufaufa tamokaḡa.” Eketa unaunana yana bwadunama si vinowaniya.
28Tovanama Midiyani tovitamaneina si kikinomana, Yosefa sisitawaḡana si niya yeyenu nenei si sinakikinomaniya keta Isimeni namoisi nenesiyai, si vitamaniya fatana siniva 20. Eketa Yosefa si niiya Itifita.
29Eyo muniyai tovanama Nubeni i makaviniya, i niya yeyenu nenei i nugenana eatu muka Yosefa ita kitai. Nuwatana i dauna keta kana nuya i kiganiniya.
30I makaviniya sisitaina nenesiyai keta i iyavisiya i bwaduwa, “Yosefa noko muka. Ava o ata fufuniya?”
31Eketa Yosefa sisitawaḡana, gouti si nuvimatiya keta ufaufanei kwame si kutuviya.
32Eyo si niiya amasi nenei keta si iyaviya si bwaduwa, “Kwame nofe ka nisaiya, ku kitai. Kamo natuu kana kwame o muka?”
33Amasi i kitakinaniya keta i iyavisiya i bwaduwa, “Ika. Natuku kana kwame. Yomuyomu-wanawanaki i kaniya. O natuku! Yomuyomu-wanawanaki i tanabwegabwegiya.”
34Eketa yana nuwatadauna nenei kana nuya i kiganiniya, atu nuya yomuyomu utuutusiyai kikifufunisi i kotoniya keta kuyadayada yagwanina natuna i fokuwiiya.
35Natunatuna matatafusi, namoḡa be vivine, kana sawamwanumwanuva fasinei si niya eatu muka nuwanuwana. Eketa i iyavisiya i bwaduwa, “Ana bwediya kana nivaniva matematesi yasi kabaḡa kana ke'ta ana vaiya natuku nukusi.” Eyo natuna fasinei i viketotoniya be i bwediya.
