1Long namba 18 yia bilong Nebukatnesar i stap king bilong Asiria, na long de namba 22 bilong namba wan mun bilong dispela yia, tok win i kamap long haus bilong king olsem em i laik inapim promis bilong em na i go mekim save long ol dispela kantri i no bin helpim em bipo.
2Orait king i singautim olgeta bikman na ofisa bilong en i kam long wanpela miting. Na em i autim tingting hait bilong em long em bai i bekim olgeta pasin nogut bilong ol dispela kantri.
3Na ol i pasim tok olsem olgeta dispela man i no bin harim tok bilong en, ol i mas i dai.
4Miting i pinis, orait Nebukatnesar i singautim namba 2 bilong em, Holofernes, em hetman bilong olgeta ami bilong em. Na king i tok,
5“Mi namba wan king bilong olgeta kantri bilong graun, mi tok olsem, nau tasol yu mas i go kisim ol man i save tru long pait. Kisim 120,000 soldia nating na 12,000 soldia i save sindaun long ol hos na pait.
6Yupela kirap i go long olgeta kantri i stap long hap san i go daun, long wanem, ol i bin sakim tok bilong mi.
7Salim tok long ol i mas kisim sampela wara na graun, na givim long mi bilong soim ol i laik aninit long mi. Long wanem, mi belhat nogut tru long ol na bai mi kam mekim save long ol. Na ol soldia bilong mi bai i krungutim olgeta graun bilong ol na brumim ples tru.
8Ol bodi bilong ol man i bin kisim bagarap bai i pulap long olgeta ples daun, na olgeta liklik wara na ol bikpela wara bai i pas long ol bodi bilong ol man i dai pinis.
9Na sapos sampela man i stap yet, orait mi bai salim ol i go kalabus long arere tru bilong graun.
10“Holofernes, yu go na kisim olgeta dispela kantri. Na sapos ol i laik putim ol yet long han bilong yu, orait yu pasim ol i stap inap long taim mi ken mekim save long ol.
11Tasol sapos ol i laik pait, yu no ken marimari long ol. Nogat. Kilim ol i dai na kisim olgeta samting bilong ol.
12Em tasol tok bilong mi. Mi namba wan king, na tru antap, long strong bilong dispela bikpela kantri bilong mi bai mi mekim olsem mi bin tok.
13Holofernes, yu harim gut. Nogut yu sakim wanpela tok bilong mi. Yu mas bihainim stret olgeta tok na wokim nau tasol.”
14King i tok pinis, orait Holofernes i lusim haus king na wantu em i singautim olgeta komanda na general na ofisa bilong ami bilong Asiria i kam bung.
15Em i bihainim oda bilong king na em i makim ol soldia i save tru long pait, em 120,000 soldia nating na 12,000 soldia i save sindaun long hos na sut long banara.
16Em i putim ol long lain bilong pait.
17Na em i kisim traipela lain kamel na donki bilong karim kago na planti moa sipsip na bulmakau na meme bilong kaikai.
18Na em i kisim skel inap long ol soldia na planti gol na silva moa long haus mani bilong king.
19Olsem na Holofernes wantaim olgeta soldia bilong en i kirap na i go paslain long King Nebukatnesar. Ol karis na ol soldia i sindaun long hos, na ol soldia nating, olgeta i kirap i go bilong pulimapim ol kantri bilong hap san i go daun.
20Bikpela lain pipel i bihainim ol soldia. Ol i planti moa moa yet, olsem ol bikpela lain grasopa i kam bung, na olsem das bilong graun. I no gat man inap kaunim.
21Ol dispela lain i lusim Ninive na i wokabaut inap 3-pela de, na ol i go kamap long stretpela ples bilong Bektilet, na ol i wokim kem klostu long taun Bektilet. Dispela taun i stap klostu long ol maunten i stap long hap not bilong distrik Silisia Antap.
22Na Holofernes i kisim olgeta ami bilong em na i lusim dispela ples na i go kamap long ples maunten.
23Ol i bagarapim tupela kantri, em Put na Lut. Ol i pulim ol gutpela samting bilong olgeta pipel bilong taun Rasis na bilong ol Ismael. Ol Ismael i save sindaun long arere bilong dispela ples drai i stap long hap saut bilong ol Kelus.
24Holofernes wantaim ol ami bilong en i bihainim wara Yufretis na i wokabaut i go insait long distrik Mesopotemia na i pinisim tru olgeta strongpela taun i stap long arere bilong wara Abron i go inap long solwara.
25Ol i kisim olgeta hap bilong distrik Silisia na kilim i dai olgeta man i laik pait long Holofernes. Na ol i wokabaut i go long hap saut inap long mak bilong Jafet na Arebia.
26Ol i raunim ol Midian na kukim ol haus sel bilong ol na stilim ol sipsip bilong ol.
27Long taim bilong kisim wit i mau, ol i go daun long stretpela ples bilong taun Damaskus. Ol i kukim ol gaden wit na pinisim ol sipsip na meme na bulmakau, na ol i bagarapim tru olgeta taun na gaden na kilim olgeta yangpela man long bainat.
28Olgeta manmeri bilong nambis ol i guria nogut tru. Olgeta pipel bilong ol taun Tair na Saidon na Sur na Okina na Japne na Asdot na Askelon, ol i pret nogut tru.
