Juan 7:2-16

²Nayan, agpet den domateng se pista te menge Judiyo iningedanan Pista te Bolongabong.

³Minikagi se menge kedowa i Jesus diyà kandin, “Mèpiya aw mesayo ka dini aw memista ka heman kidoen te probinsya te Judiya amon komità se menge otaw tinoledaan no te kepelahan eg-inangen nikaw.

⁴Aw meibeg se otaw te medengeg se ngadan din, eked din elesi se inangen din. Yan aw doen kepelahan inangen no, mèpiya aw ipekità no iyan diyà te kedita te otaw dini te keneyonan.”

⁵Yan se inikagi dan, so pengkey telekedowa dan si Jesus, meneng wedà dan pemenal kandin.

⁶Minikagi si Jesus, “Wedà pa dateng se kanak aldaw. Meneng pengkey eden eldawi se mepakay diyà kenyo.

⁷Eked kaw kebensihi te menge otaw egtaking te ibeg te keneyonan, meneng kebensihan a dan, so gayed a eg-ikagi diyà kandan te medaet se eg-inangen dan.

⁸Onà kaw doton te pista. Eked a pa doton so wedà pa dateng se aldaw te pegdoton ko.”

⁹Penga te peg-ikagi din kenyan, mig-ogpà pa sikandin kidoen te probinsya te Galiliya.

¹⁰Penga te pegdoton te menge kedowa i Jesus te pista kidoen te Jerusalem, dimoton heman sikandin te eles-eles, so ibeg din wedad otaw metaga-taga te pegdoton din.

¹¹Kidoen te Jerusalem, doen menge obanen te Judiyo nengemahà kandin, aw migpeinsaay dan, “Kenan lebò sikandin?”

¹²Medita se otaw netipon kidoen te pista, aw migpedindilay dan tepad ki Jesus. Doen menge otaw minikagi, “Mèpiya otaw sikandin.” Doen heman menge doma otaw minikagi, “Kenà, so eg-akal sikandin te otaw pineokit te ipegtoladà din.”

¹³Meneng in-eles dan se peg-ikagi dan kenyan, so nelemitan dan te menge obanen te Judiyo neopal kandin.

¹⁴Pegketengà te pista, dimoton si Jesus te dakel simbahan te Judiyo kidoen te Jerusalem, aw migtoladà te otaw netipon kidoen.

¹⁵Pegtoladà din, ontò nepela se menge obanen te Judiyo, aw minikagi dan, “Kenan lebò lekat se kebiyasa te otaw seini? So wedà sikandin toledai te menge pengolo te simbahan.”

¹⁶Timaba si Jesus kandan, kagi din, “Wedà ko teboki se kebenalan intoladà ko seini, meneng lekat iyan te Timanem simogò kanak.