Juan 7:12-47

¹²Medita se otaw netipon kidoen te pista, aw migpedindilay dan tepad ki Jesus. Doen menge otaw minikagi, “Mèpiya otaw sikandin.” Doen heman menge doma otaw minikagi, “Kenà, so eg-akal sikandin te otaw pineokit te ipegtoladà din.”

¹³Meneng in-eles dan se peg-ikagi dan kenyan, so nelemitan dan te menge obanen te Judiyo neopal kandin.

¹⁴Pegketengà te pista, dimoton si Jesus te dakel simbahan te Judiyo kidoen te Jerusalem, aw migtoladà te otaw netipon kidoen.

¹⁵Pegtoladà din, ontò nepela se menge obanen te Judiyo, aw minikagi dan, “Kenan lebò lekat se kebiyasa te otaw seini? So wedà sikandin toledai te menge pengolo te simbahan.”

¹⁶Timaba si Jesus kandan, kagi din, “Wedà ko teboki se kebenalan intoladà ko seini, meneng lekat iyan te Timanem simogò kanak.

¹⁷Aw meibeg se otaw tomolò te ibeg te Timanem kandin, yan se otaw metaga-taga aw kenan lekat se kebenalan ipegtoladà ko, aw lekat iyan te Timanem aw tinebok ko.

¹⁸Aw teboken te otaw se itoladà din, ibeg din domuyun te kandin pegkeotawun. Meneng aw pineokit te pegtoladà din, iduyun din se simogò kandin, yan se pengilala te benal se ipegtoladà din, aw kenà sikandin bolelawun.

¹⁹Kineliwatan kaw i Moises te menge punù, meneng wedad palos otaw kidoen kenyo timolò kenyan. Nengà lay ibeg niyo pa mengimatay kanak?”

²⁰Timaba se menge otaw netipon, kagi dan, “Migkebook ka den so dinetengan ka te bosaw. Wedad man otaw meibeg mengimatay kamno.”

²¹Minikagi si Jesus, “Doen olò sebad kepelahan ininang ko, aw nepela se kedita niyo so aldaw te peg-etod.

²²Gebii, migpunù si Moises te keilangan tolien se dedeitek batà niyo meama. Pengkey yan se impunù din, meneng olò din ingkeliwat se ketanem tapay pa tinekingan te kemonaan tadon gebii. Yan keilangan tolien se batà niyo pengkey aldaw te peg-etod.

²³Yan eked kepakay aw keopalan a niyo, so aw mepakay se pegtolì niyo te otaw dalem te aldaw te peg-etod amon toloen se punù ingkeliwat i Moises, mepakay heman se pegpegolì ko te kedakel te lawa te otaw dalem te aldaw te peg-etod.

²⁴Yan ikà niyo egsila te otaw singed aw ketegahan niyo se ontò kebenalan.”

²⁵Doen menge tege Jerusalem migpebelaw-belaway, kagi dan, “Indà, sikandin se otaw egpemehaen amon imetayan.

²⁶Meneng nepela kay so egtoladà sikandin kinità te kedita tadon, aw wedad palos otaw migsagda kandin. Netaga-taga den besi se menge pengolo te simbahan tadon te ontò sikandin se Misiyas megpelowà kenitadon.

²⁷Meneng kenà din besi se pinelimanan tadon, so aw domateng se Misiyas isogò te Timanem, wedad otaw metaga-taga aw kenan sikandin lekat. Meneng netegahan tadon se tinikedowan te otaw seini.”

²⁸Pegtoladà i Jesus kidoen te dakel simbahan te Jerusalem, minikagi sikandin, “Eden niyo aw netegahan niyo te sinu a aw kenan a lekat. Dimini a kenà pineokit te kenaken ibeg, meneng insogò a dini. Egkeseligan se simogò kanak, meneng wedà kaw ketaga-taga kandin.

²⁹Netaga-taga a kandin so dimini a lekat kandin, aw sikandin se simogò kanak.”

³⁰Peg-ikagi din kenyan, doen menge otaw meibeg megdakep kandin, meneng wedà dan deleg, so wedà pa dateng se aldaw pinemallì te Timanem te pegdakep kandin.

³¹Meneng medita se doma otaw nemenal te sikandin se insogò te Timanem. Minikagi dan, “Aw domateng se Misiyas megpelowà kenitadon, wedad kepelahan inangen din labi pa mèpiya diyà te eg-inangen te otaw seini.”

³²Pegdineg te menge Parisiyo te eg-ikegiyen te otaw netipon, migsebad dan diyà te menge pengolo te simbahan te Judiyo, aw insogò dan se menge teletonggò te simbahan amon dekepen dan si Jesus.

³³Minikagi si Jesus diyà te otaw netipon, “Te eked kenamay, mesayo a lekat dini, so molì a doton te simogò kanak.

³⁴Pengkey mengemahà kaw kanak, meneng eked kaw kità kanak, so eked kaw pekedoton te ogpeanan ko.”

³⁵Pegdineg te menge obanen te Judiyo kenyan, migpeinsaay dan, “Kenan lay pesalo sikandin te eked tadon kitai? Domoton lay sikandin te mediyò lonsod eg-ogpaan te menge Judiyo nesakop te kenà Judiyo amon megtoladà te menge otaw kenà Judiyo?

³⁶Eden lay se kedegdagan te inikagi din te eked kidon pekekità kandin pengkey mengemahà kidon kandin? Nengà lay minikagi sikandin te eked kidon pekedoton te ogpeanan din?”

³⁷Se temanan aldaw te Pista te Bolongabong, yan se ontò melangkaw aldaw diyà te kedita te Judiyo. Pegdateng te temanan aldaw te pista, timindeg si Jesus kidoen te dakel simbahan aw minikagi te dakel se kagi din, “Aw sinu se nelao, domiyà kanak, so ipeinem ko.

³⁸Aw memenal se otaw kanak, metoman diyà kandin se kagi te Timanem insolat, ‘Kidoen te pedowan din, tomebol se wayeg mekebegay te kaling pedowan wedad temanan.’”

³⁹Se inikagi din tepad te wayeg, yan se tegdeyanan din tepad te Espiritu Santo ibegay diyà te kedita te otaw memenal kandin. Meneng wedà pa dateng se Espiritu Santo kandan, so wedà pa pegpeengat si Jesus doton te langit.

⁴⁰Pegdineg dan te inikagi din, doen menge otaw minikagi, “Sikandin se ontò benal telekeliwat te kagi te Timanem tapay din impakang.”

⁴¹Minikagi se menge doma otaw, “Sikandin se Misiyas megpelowà kenitadon.” Meneng doen heman menge doma otaw minikagi, “Kenà sikandin se egpelimanan tadon, so kenà tege Galiliya se Misiyas megpelowà kenitadon.

⁴²Doen kagi te Timanem insolat te keilangan pelimanan tadon se Misiyas bowad-bowad te kemonaan tadon si David. Tomebaw se Misiyas egpelimanan tadon kidoen te Bitlihim, so yan se lonsod inogpaan i David.”

⁴³Wedà dan pegsebad, aw yan se doun te migpedindilay dan tepad kandin.

⁴⁴Doen menge otaw kidoen kandan meibeg megdakep kandin, meneng wedad otaw minawid kandin.

⁴⁵Peg-olì te menge teletonggò te simbahan kidoen te menge otaw simogò kandan, mig-insà se menge Parisiyo aw pengolo te simbahan, kagi dan, “Nengà lay wedà niyo ibingi?”

⁴⁶Timaba se menge teletonggò, kagi dan, “So wedad palos otaw migtoladà te kebenalan iling te pegtoladà din.”

⁴⁷Minikagi se menge Parisiyo, “Neekalan kaw din kedì heman.