Juan 5:3-13

³Je̱p tseꞌe e̱pu̱tso̱o̱ktku̱n paꞌtkup myaꞌajta vyeꞌna nu̱may je̱ paꞌam jáyuda: je̱m tseꞌe je̱ viints jáyuda, je̱m tseꞌe je̱ u̱xke̱t jáyuda, je̱m tseꞌe je̱ꞌe̱da juuꞌ veꞌe pa̱jkju̱dup je̱ pata̱ꞌa̱jts paꞌam, je̱mpa tseꞌe juuꞌ veꞌe je̱ kya̱ꞌa̱jta je̱ tyekta tu̱tyunta̱a̱tsni. Je̱ꞌe̱ts je̱ꞌe̱ veꞌe yꞌaꞌíxtup ku veꞌe je̱ tsoxk na̱a̱j jyepu̱tsyo̱ꞌo̱yu̱t,

⁴ku̱x veꞌemeꞌe je̱ jayu vyinmaaydi je̱ts toꞌma jatyeꞌe toꞌk je̱ ángeles vyáñu̱k yꞌijt joma veꞌe je̱ na̱a̱j naaꞌpá̱ts je̱tseꞌe du̱jepu̱tsyo̱ꞌo̱y je̱ na̱a̱j. Veꞌem tseꞌe vyinmaaydi je̱ts pa̱n pa̱neꞌe mutooꞌva̱jkp ta̱jkip je̱m na̱jo̱o̱tm ku veꞌe tu̱jyepu̱tsyo̱ꞌo̱y vyeꞌna, jo̱tka̱daakp tseꞌe, jyatipaꞌama veꞌe du̱ma̱a̱da.

⁵Je̱m tseꞌe vyeꞌna toꞌk je̱ yaaꞌtya̱jk juuꞌ veꞌe iiꞌpx maktoodojt joojntani paꞌamꞌijtp.

⁶Ku veꞌe je̱ Jesús yꞌixji je̱tseꞌe du̱nu̱jaꞌvi je̱ts jékani veꞌe pyaꞌamꞌít, vanꞌit tseꞌe du̱nu̱u̱jmi: ―¿Mtsa̱jkpeꞌe je̱tseꞌe mjo̱tka̱daꞌaku̱t?

⁷Vanꞌit tseꞌe je̱ paꞌam jayu yꞌatsa̱a̱jv: ―Kaꞌa xa veꞌe pa̱n pa̱n pa̱n a̱tseꞌe xyaktá̱kap yam na̱jo̱o̱tm ku veꞌe ya̱ na̱a̱j jyajepu̱tsyo̱ꞌo̱y. Ku xa a̱tseꞌe njata̱kavaꞌañ, viijnk tseꞌe ta̱jkiko̱jp.

⁸Je̱tseꞌe je̱ Jesús ña̱ꞌmu̱xji: ―Pojtu̱kni, pa̱kmojkni ya̱ mmaajntku̱n, je̱ts jaamni.

⁹Tun jatyji tseꞌe je̱ yaaꞌtya̱jk jyo̱tka̱daakni, je̱ myaajntku̱n du̱pa̱kmojkni, je̱tseꞌe yo̱ꞌpya̱jkni. Ax po̱o̱ꞌkxtku̱n xa̱a̱jts je̱ꞌe̱ veꞌe vyeꞌna vanꞌit,

¹⁰je̱ꞌe̱ ka̱jx tseꞌe je̱ israeejlit jayu du̱nu̱u̱jmidi je̱ yaaꞌtya̱jk juuꞌ veꞌe jo̱tka̱daaknu: ―Po̱o̱ꞌkxtku̱n xa̱a̱j xa veꞌe u̱xyam, kaꞌa tseꞌe je̱ pavaꞌnu̱n du̱yakjaty je̱tseꞌe xpapá̱ku̱t ya̱ mmaajntku̱n.

¹¹Vanꞌit tseꞌe je̱ yaaꞌtya̱jk yꞌatso̱o̱jvjidi: ―Je̱ꞌe̱ juuꞌ a̱tseꞌe tu̱xyakjo̱tka̱daꞌaky, je̱ꞌe̱ts a̱tseꞌe tu̱xnu̱u̱jma: “Pa̱kmojkni ya̱ mmaajntku̱n je̱ts jaamni.”

¹²Vanꞌit tseꞌe du̱ꞌamo̱tutú̱vidi: ―¿Pa̱nts je̱ꞌe̱ veꞌe juuꞌ veꞌe tu̱mna̱ꞌmu̱xju̱: “Pa̱kmojkni ya̱ mmaajntku̱n je̱ts jaamni”?

¹³Ax kaꞌats je̱ꞌe̱ veꞌe du̱nu̱java pa̱n pa̱n je̱ꞌe̱ veꞌe yakjo̱tka̱daakjinu ku̱x tá̱vani veꞌe du̱ꞌixtó̱kini vyeꞌna je̱ Jesús je̱m nu̱may jayu akojkm juuꞌ veꞌe je̱m veꞌnidup.