Jowãw 5:3-13

³Ta ti yt hã hajõk nahëë enäh. Sa mahang ty temah doo, nabong doo, k'yy gedóm doo. Ta tii bä ragada mä naëng ketaam doo.

⁴Ta see pé noo gó m' P'op Hagä Do ããs bahyng mäh, tabetaam hyb n'aa naëng. Tabetaam jawén paa bä, pooj jé tame hahop do has'oo däk mä nahëë näng do paah.

⁵Nahëë enäh do sa mahang ti asooh mä aj'yy, 38 däg ta baab ta nahëëh. Nawäd tii.

⁶Ti m' Jesus bahapäh bä aj'yy hasooh doo, taky n'aa napäh bä p'ooj däg ta nahëëh taky hadoo ta hã: —Makarẽn mabahas'oo däk? —näng mäh.

⁷Ti m' aj'yy ky hadoo: —Dooh ỹ haja bä —näng mäh. —Dooh ỹ masa pé naëng ketaam jawén paa bä, ỹ bahop hyb n'aa. Ỹ kakoon nuuj jé, ta see bahop pój ỹỹ jé. Ti hedo had'yyt hẽ —näng mä aj'yy kyyh.

⁸Ti m' Jesus ky hadoo ta hã: —As'ëëg g'ëëd! —näng mäh. —Mado däg a tyng. Awäd däg —näng mä Jesus kyyh aj'yy hã.

⁹Nayyw hẽ m' tabas'ëëg g'ëëd kän, tado däk ta tyng kä, awäd däg kän mäh. Saab noo gó m' ta tii, Judah buuj rakamehehãk do hã.

¹⁰Ti hyb n'aa Judah buuj sa wahë n'aa raky hadoo aj'yy hã: —Saab naga hẽ. Dooh ër ky n'aa jaw'yyk do an'oo bä ji tyng ji atón bä Saab hã —näk mä sa kyyh.

¹¹Ti m' aj'yy ky hadoo sa hã: —Aj'yy ỹ haso däk do ky hadoo hã ỹỹ: “Mado däg a tyng. Awäd däg”, näng hã ỹỹ —näng mä aj'yy.

¹²Ti m' raky hadoo ta hã: —Jaa ti ta ti a hã hedoo doo? —näk mäh.

¹³Dooh m' aj'yy hapëë bä. Dooh wäd mä tii bä Jesus. Hajõk do mahang tabawäd däk.