Juan 4:25-32

²⁵Sayno niptinmi say warmi nergan: “Cristo shamunanpä cashganta musyämi, taytay. Pay shamurnami saycunata tantyasimäshunpä.”

²⁶Saymi Jesús nergan: “Say shamunanpä cäga nogami caycä.”

²⁷Micuyta rantiyämushganpita cutiycurmi discïpuluncuna Jesusta tarergan say warmiwan parlaycagta. Saymi quiquinpura: “¿Imanirtä cay warmiwan Jesús parlaycan?” niyargan. Isanga mayganpis manami tapupäyargansu imata parlayashgantapis.

²⁸Warminami uylunta cachariycushpan marcaman aywar runacunata wilargan:

²⁹“Juc runami pözu cagcho caycan. Paymi nimash imano cashgätapis. Acu aywashun ricayänayquipä. ¿Manasurä pay caycan salvamagninsi Cristo?” nir.

³⁰Sayno niptinmi runacuna aywayargan Jesús caycashgan cagman payta ricayänanpä.

³¹Sayyagmi discïpuluncuna Jesusta nergan: “Micushunna, taytay.”

³²Saymi Jesús nergan: “Nogapa micuynë jucmi caycan.”