Juan 4:1-22

¹Juaman honanmaxon nashimahi mentan hashoan hihti caibo Jesusen honanmaxon nashimahi cahen fariseobaan nincascaquin.

²Jaanbi Jesusen nashimayamahi bi ta jahuen haxenicabaan res nashimanishqui.

³Jahuen nashimatibo caichai fariseobaan joi nincacai honanxon Judea mai Jesusen potabahinquin, Galilea main caribinoxon.

⁴Galilea main canoxon cahen Samaria mai nabebacahinti jai.

⁵Cahi, Samaria mai meha jema janin nocoti, Sicar janeya jeman. Jacobonen jahuen baque José hinanni mai hochomahi.

⁶Jene bihnoxon ta janobi Jacobonen mai poquinnishqui. Poquinxon chiquerihbiquin. Jano sca ta Jesus noconishqui. Bahin nihnichi paxquinax, barin manan tsacahiya jaa mai poquin quexa Jesus tsahopaqueti.

⁷Jahuen haxenicabo jema janin piti benahi canon cahen jano manati. Manahahnan, samaritano haibo jene bichi jahuiton, yocaquin: —Hen nominon jene pishca hea bihxonhue, haibon —hahquin Jesusen.

⁹Jaatian: —¿Jenquetsahaxon min mia judio hihxon bi hea samaritano haibo jene yocacain? —samaritano haibaan Jesus yocaquin. Judiobaan samaritanobo jistahihmahi copi haibaan jascajaquin.

¹⁰—Tsoan mia jene yocacai honanxon cah min mianbi jaa yocacan. Papan mia hinanai rihbi honanxon cah min yocacan. Jaatian ta mia jene mohini hinanquehanihqui —Jesusen jaquin.

¹¹—Mai poquin ta nemin qui, bebon. Hahan tsecati rihbi tah min yamahi. ¿Jahuen min jascapa jene mohini bihtihin?

¹²Noquen xeni Jacobonen ta nea noa xehanishqui. Jahuen baqueboyaxonbi jahuen yohinabaan rihbi nea jene xehaquin. Nea noa noque jaan hinannih que bi cahran min jaa mentan hashoan coshi quin? —hahquin haibaan.

¹³Jaatian Jesusen sca: —Nea jene hahcaibo ta hahquirihbi nomicatsihnoxihquiqui.

¹⁴Hean jene hinanah xehahax ta jahuentianbi jiricatsihyamascatihiqui. Jaa chicho quehax ta hen hinanai jene mohini jahuentianbi taraxaxma jabascatihiqui —haibo jaquin.

¹⁵—Jaa jene hea hinanhue, bebon, jiricatsihyamascaax hen neno jene bichi jori joriyamascanon —haibaan Jesus jaquin.

¹⁶Jesusen sca: —Miin bene quenatanhue, joribinoxon —jaa haibo jaquin.

¹⁷Jascahah: —Heen bene ta yamahihqui —hahquin haibaan. —Yohiquin sirija tah min jai, miin bene yamahi.

¹⁸Pichca miin bene janish bi cah min rahma huetsa betan hihrihbihi, miin benema rihbi. Hihcoin tah min jai —hahquin Jesusen.

¹⁹—Papan joi yohinica mia quin hen ta hen honanscai, bebon.

²⁰Nea machinxon ta noquen xenibaan betihihpaquexon Papahon shinanpahonishqui, Jerusalen janinxon non Papahon shinanti jai man maton jai bi —hihqui haibo.

²¹Jesusen sca: —Hen mia yohihah nincacoinhue, haibon. Papahon shinanaibaan ta nea mahchinxonma bi Jerusalen janinxonma rihbi noquen Papahon man shinanyaxihqui.

²²Man honanyamahi naman tah man betihihpaquetai, Papahon shinancatsihqui. Non honanai naman betihihpaquexon tah non noquen shinanai. Jihuemanicah ta judio xohta qui.