ዮሃኒሳ 4:1-22

Click on verse(s) to share them!

¹ዬሱሲ ዮሃኒሳይሳፌ ዳሪያ ካሌይሳታ ባኮ ሺሼይሳኔ ፃማቄይሳ ፋሪሳዌቲ ሲዒዶሶና።

²ጊዲኮካ ዬሱሳ ታማሬቲ ፃማቂዶሶናፔ ኣቲን ዬሱሲ ኦናካ ፃማቂቤና።

³ዬሱሲ ኣሳይ ኢያባ ጌይሳ ሲዒዳ ዎዴ ዪሁዳፔ ዴንዲዲ ጋሊላ ቢስ።

⁴ጋሊላ ቢሼ ሳማሬራ ኣꬋናይሲ ኢያው ኣቶናባ ጊዲስ።

⁵ሄሳ ጊሾ፥ ያይቆቢ ባ ናዓ ዮሴፋስ ኢሚዳ ጋዲያ ማታን ዴዒያ ሲካሬ ጊያ ሳማሬ ካታማ ቢስ።

⁶ሄ ቤሳን ያይቆባ ሃꬃ ኦላይ ዴዔስ። ዬሱሲ ሃሙꬃን ዳቡሪዲ ሄ ሃꬃ ኦላ ማታን ኡቲስ። ሄ ዎዴ ሳዓይ ኡሱፑን ሳቴ ሄራ።

⁷ኢሲ ሳማሬ ካታማ ማጫስ ሄ ኦላፌ ሃꬄ ቲካናው ያሱ። ዬሱሲ ሄ ማጫሴኮ፥ «ታና ሃꬄ ኡሻርኪ» ያጊስ።

⁸ሄ ዎዴ ዬሱሳ ታማሬቲ ካꬂ ሻማናው ካታማ ቢዶሶናሺን።

⁹ሄ ማጫሲያ ዛራዳ፥ «ኔኒ ኣይሁዴ ኣሴ ጊዳሼ፥ ሳማሬ ማጫስ ጊዲያ ታና ዋናዳ ሃꬄ ኡሻ ጋይ?» ያጋሱ። ሄሳ ኢያ ጊዳይ ኣይሁዴቲ ሳማሬታራ ጋሄቶና ጊሾሳ።

¹⁰ዬሱሲ ዛሪዲ፥ «ኔኒ ፆሳ ኢሞታኔ ሃꬄ ታና ኡሻ ጌይሲ ኦኔኮ ኤሪዳባ ጊዲያኮ ኢያ ኔ ዎሳና፤ ኢካ ኔው ዴዖ ኢሚያ ሃꬂ ኢማናሺን» ያጊስ።

¹¹ማጫሲያ ዛራዳ፥ «ጎዳው፥ ኔው ዱቂያባይ ባዋ፤ ኦላይካ ዚቃ። ያቲን፥ ዴዖ ኢሚያ ሃꬂ ኔ ኣዉፔ ኤካኔ?

¹²ኑስ ሃ ሃꬃ ኦላ ኢሚዳ ኑ ኣዋ ያይቆባፔ ኔኒ ኣꬋይ? ኢ፥ ኢያ ናይቲኔ ኢያ ሜሄይ ሃ ኦላፌ ኡዪዶሶና» ያጋሱ።

¹³ዬሱሲ፥ «ሃ ሃꬃፌ ኡዪዳ ኦኒካ ዛሪ ሳሞታና።

¹⁴ሺን ታኒ ኢማና ሃꬃ ኡያ ኦኒካ ኡባካ ሳሞቴና። ታኒ ኢማና ሃꬃይ ኢያ ጊዶን ሜሪና ዴዖ ኢሚያ ጎጊያ ፑልቶ ጊዳና» ያጊስ።

¹⁵ማጫሲያ ዛራዳ፥ «ጎዳው፥ ታኒ ሳሞቶና ሜላኔ ሃꬄ ቲካናው ሃ ቤሳ ዮና ሜላ ታው ሄ ሃꬃ ኢማ» ያጋሱ።

¹⁶ዬሱሲ ኢኮ፥ «ባዳ ኔ ኣዚና ፄጋዳ ያ» ያጊስ።

¹⁷ማጫሲያ ዛራዳ፥ «ታው ኣዚኒ ባዋ» ያጋሱ። ዬሱሲ ኢኮ፥ «ታው ኣዚኒ ባዋ ጉሳን ባላባካ።

¹⁸ኔው ካሴ ኢቻሹ ኣዚናቲ ዴዖሶና። ሃዒ ኔራ ዴዒያ ኣዴይ ኔ ኣዚና ጊዴና። ኔኒ ሃዒ ቱማ ኦዳዳሳ» ያጊስ።

¹⁹ማጫሲያ ዛራዳ፥ «ጎዳው፥ ኔኒ ናቤ ጊዴይሳ ታኒ ኤራስ።

²⁰ኑ ኣዋቲ ሃ ዴሪያ ቦላ ፆሳ ጎይኒዶሶና። ሺን ሂንቴ ኣይሁዴቲ ኣሲ ፆሴ ጎይናናው ቤሲያ ቤሳይ ዬሩሳላሜና ጌታ» ያጋሱ።

²¹ዬሱሲ፥ «ሃ ማጫሴቴ ታና ኣማና፤ ሃ ዴሪያ ቦላ ዎይኮ ዬሩሳላሜን ኣዋ ሂንቴ ጎይኖና ዎዴይ ያና።

²²ሂንቴ ሳማሬቲ ኤሮናይሳ ጎይኔታ። ሺን ኑኒ ኣቶቴꬃይ ኣይሁዴፔ ያ ጊሾ ኑ ኤሬይሳ ጎይኖስ።