Juan 3:8-21

⁸Egkedog se kelamag egpesalo pengkey kenan. Meneng pengkey egdinegen no se logo-logo niyan, eked no ketegahi aw kenan iyan lekat aw kenan pesalo. Iling heman kenyan se pegtebaw te otaw pineokit te Espiritu Santo.”

⁹Mig-insà si Nicodemo, “Menonen se peg-inang kenyan?”

¹⁰Timaba si Jesus, “Nepela a, so pengkey sikona se meistro te menge bowad-bowad i Israel, meneng wedà no pa iyan kelebeti.

¹¹Eneng-enengi se kagi ko kamno. Eg-ikegiyen day se netegahan day, aw ipeg-indan day se benal kinità day, meneng wedà kaw pemenal te inikagi day.

¹²Aw eked kaw pemenal te in-indan ko tepad te meinang dini te tanà, eked kaw heman pemenal aw meg-indan a kenyo tepad te meinang doton te langit.

¹³Wedad palos otaw nenayit doton te langit, meneng olò siak Timanem Migpekeotaw se timenà lekat te langit.

¹⁴“Gebii te pegkegelà te menge Judiyo lekat te pegtongkà te menge memokan kidoen te kebigtilan, ininang i Moises se memokan lekat te galang, aw insawol din iyan kidoen te kayo intollok amon eked kematay se otaw tomengteng kenyan. Iling heman kenyan, siak Timanem Migpekeotaw se isawol kidoen te kayo itollok.

¹⁵Meinang iyan amon kebegayan te kaling pedowan wedad temanan se kedita te otaw memenal kanak.”

¹⁶Ontò nedekelan te Timanem te pedowan se kedita te otaw, aw yan se doun te insogò din se Batà din temisa amon eked pelumuni se kedita te otaw memenal kandin, meneng begayan dan te kaling pedowan wedad temanan.

¹⁷Insogò te Timanem se Batà din dini te keneyonan kenà amon ipelumun din se otaw, meneng insogò din amon megpelowà te otaw.

¹⁸Aw memenal se otaw diyà te Batà te Timanem, eked dan pelumuni te Timanem. Meneng aw eked dan pemenal, netegahan den te metoman dan ipelumun, so wedà dan pemenal diyà te Batà te Timanem temisa.

¹⁹Seini se doun te ipelumun dan. Pegdateng te iningedanan Lowa dini te keneyonan, neibeg dan te kengitngitan aw kimulu dan te kelowahan, so medaet se eg-inangen dan.

²⁰Se otaw eg-inang te medaet, yan se eked keibeg te kelowahan, aw megpekediyò dan kidoen te kelowahan amon eked ketegahi se inang din medaet.

²¹Meneng se otaw egtaking te kebenalan, yan se megpedapag diyà te kelowahan, amon ketegahan te eg-inangen din se ibeg te Timanem.