Juan 3:19-31

¹⁹Seini se doun te ipelumun dan. Pegdateng te iningedanan Lowa dini te keneyonan, neibeg dan te kengitngitan aw kimulu dan te kelowahan, so medaet se eg-inangen dan.

²⁰Se otaw eg-inang te medaet, yan se eked keibeg te kelowahan, aw megpekediyò dan kidoen te kelowahan amon eked ketegahi se inang din medaet.

²¹Meneng se otaw egtaking te kebenalan, yan se megpedapag diyà te kelowahan, amon ketegahan te eg-inangen din se ibeg te Timanem.

²²Penga niyan, dimoton si Jesus aw menge tinoledaan din te probinsya te Judiya. Mig-ogpà dan kidoen aw migbonyag.

²³Migbonyag heman si Juan Memonyagay so wedà pa kelebosowi. Migbonyag sikandin kidoen te Inon medapag te Salim, so dakel se wayeg kidoen. Dimoton se menge otaw kandin aw binonyagan din dan.

²⁵Doen menge tinoledaan i Juan aw sebad Judiyo migpedindilay tepad te pegpelinis.

²⁶Dimoton dan ki Juan aw minikagi, “Sir, se doma no kedengan doton dipag te Jordan, sìyan in-indan no, yan se egpemonyag den ekon heman, aw medita den se otaw limengà te pegtaking dan kamno aw timaking den dan diyà kandin.”

²⁷Minikagi si Juan, “Wedad mebatog te otaw singed aw isogò sikandin te Timanem.

²⁸Netegahan niyo den te minikagi a te kenà ko se Misiyas megpelowà kenyo. Meneng insogò a amon megpetagad a te pegdateng din.

²⁹Se meama peipiden, yan se tekingan te bayi. Meneng se sigalak te meama peipiden, yan se megtagad kandin aw menenalan heman kandin, aw meluba se pedowan din te pegdineg din te kagi te sigalak din peipiden. Iling a heman kenyan, so nesikop den se keluba te pedowan ko te pegdineg ko te medita se otaw egtaking ki Jesus.

³⁰Keilangan megkedakel se dengeg i Jesus, aw metostos se kanak dengeg.”

³¹Se insogò dini lekat te langit, yan se ontò melangkaw diyà te kedita. Meneng se otaw dini te tanà, yan se otaw lekat dini te tanà, aw lekat heman te tanà se ipegtoladà din. Meneng se insogò dini lekat te langit, yan se ontò melangkaw diyà te kedita.