Josua 24:7-17

⁷Ma êsêac aweŋ gêjac Apômtau ma eŋ kêkêŋ gêsuŋbôm geŋ amac to lau Aiguptu kêsi to gêgôm gwêc kêmakop e kêsalê êsêac auc. Amac matemanô alic gêŋ, taŋ aê gagôm gêdêŋ Aiguptu naŋ su. Amac amoa gamêŋ sawa ŋasawa baliŋ.

⁸Go aê gawê amac aô lasê lau Amor, taŋ sêŋgôŋ Jordan ŋamakeŋ ônêŋa naŋ, nêŋ gamêŋ. Gêdêŋ taŋ kakêŋ êsêac sêsêp amac lemem ma amac akôc êsêacnêŋ gamêŋ su naŋ, aê gaseŋ êsêac gamuŋ amac.

⁹Go kiŋ Moabŋa Sipor latu Balak gêdi ma gêjac siŋ gêdêŋ Israel. Eŋ kêsakiŋ biŋ gêdêŋ Beor latu Bileam gebe êmêŋ ma êpuc boa amac.

¹⁰Mago aê kakêŋ taŋoc Bileam atom, tec eŋ gêjam mec amac. Gagôm amboac tonaŋ, tec gajam amac kêsi aŋga Balak lêma.

¹¹Go amac alom bu Jordan e aô lasê malac Jeriko. Ma lau Jerikoŋa sêjac siŋ gêdêŋ amac. Mago lau Jeriko tauŋgeŋ atom, lau Amor to Peres ma Kanaan to Het ma Girgas to Hiw ma Jebus amboac tonaŋgeŋ. Mago aê kakêŋ êsêac sêsêp amac lemem.

¹²Aê kasakiŋ banic gêmuŋ ma kêjanda lau Amor nêŋ kiŋ luagêc gêmuŋ amac. Amacnêm siŋ to talam gêgôm atom.

¹³Aê kakêŋ gamêŋ teŋ, taŋ ajam kôm kêpi atom naŋ, gêdêŋ amac ma kakêŋ malac, taŋ amac akwê sa atom naŋ, gêdêŋ amac aŋgôŋ. Amac aeŋ kôm wainŋa to katêkwi, taŋ asê atomanô naŋ ŋanô.’

¹⁴“Amboac tonaŋ galoc atêc Apômtau to anam sakiŋ eŋ têmtac makeŋ ma tonêm ŋalêlôm ŋaŋêŋgeŋ. Atiŋ anôtôi jaba, taŋ tamemi sêjam sakiŋ aŋga bu ŋamakeŋ ônêŋa to aŋga Aiguptu naŋ su, ma anam sakiŋ Apômtau.

¹⁵Mago amac embe andec gebe anam sakiŋ Apômtau, go ocsalô tonec ajaliŋ anôtôi, taŋ abe anam sakiŋ naŋ sa. Abe anam sakiŋ anôtôi, taŋ tamemi sêjam sakiŋ aŋga bu ŋamakeŋ ônêŋa naŋ, me lau Amor, tec aŋgôŋ êsêacnêŋ gamêŋ nec, nêŋ anôtôi me. Mago aê to ŋoc gôlôac abe anam sakiŋ Apômtaugeŋ.”

¹⁶Go lau tau sêjô eŋ awa gebe “Biŋ tonec gebe awi Apômtau siŋ ma anam sakiŋ anôtôi jaba nec ênac jaê aêac,

¹⁷gebe Apômtau, aêacnêŋ Anôtô, gêwê aêac to tameŋi tapi aŋga Aiguptu tamêŋ ma gêwê aêac dawi andu kapoacwalôŋa siŋ. Eŋ gêgôm gêŋsêga kaiŋ teŋ aêac talic ma gejob aêac aŋga intêna samob, taŋ tasa naŋ, ma gejob aêac gêdêŋ taŋ tasêlêŋ tasêp lau tomôkê-tomôkê ŋalêlôm naŋ.