Josua 10:5-14

⁵Amote kiŋi kingi paki dusipame Jerusaleme range kiŋi dokope Eperone range kiŋi dokope Jamura range kiŋi dokope Lakisi dee Ekelone range kiŋi dolapope nakamana yanda singi dupwa peparae nyuo malu palyuo yuu Gipione doko awali lao karo yanda piyami.

⁶Dokopa Gipione range dupwame Josua yuu Gilikale paleyamo dokona pii wai nembo leyami. Embame namwa yaki nyii napipi. Emba waiya lao aopa epo namwa nyiso lete wai pyao nyelase. Amote kiŋi yuu kyau dupwana palenge dupwa peparaeme malu palyapala namwa pyala epelyaminyi, leyami.

⁷Leyaminyi doko sepala Josua banya yanda singi peparae dupwa pipya yuu Gilikale yaki nyepala nyisala peyami.

⁸Peyaminyi dokopa Kamongome Josua lamaiyuo, Ama paka napipi. Wambu dupwana mendeme emba pyao isa palya narami. Nambana porainya renge dokome embame wambu dupwa nyuo anamasi minyare, leya.

⁹Leyamo dokopa Josua dee banya yanda singi dupwape kukwa yuu Gilikale dokona karo yuu Gipione peyami. Papala Amote wambu dupwa rapa rapa pii nayaminyipa nakamame wambu dupwa walu lao piyami.

¹⁰Amote wambu dupwame Isaraele yanda singi dupwa epeyaminyi kandeyaminyi dokopa Kamongome nakama pakanyi pyambuya. Pyambuyamo dokopa Isaraele wambu dupwame Amote wambu yuu Gipione dokona pyapala yuu Beterome kyau kata kuki mendena pyao lano ralinyi nembeyami. Ralinyi nembo pao yuu Aseka dee Maketa yuu donorena singi dokona pyambuyami.

¹¹Isaraele wambu dupwame peteta peyaminyi dokopa Amote wambu dupwa lano makando peyaminyipa Kamongome yake dokona piso randake kapa isa peyapala wambu malumee pyao kumakaya. Isaraele wambu dupwame wambu pyao kumakayaminyipape randake kapame kamame wakasa pyao kumakaya.

¹²Kamongo dokome Isaraele akali dupwa nyisiyamopa Amote akali dupwa pyao wini piyami. Yuu gii dokopa Josuame Kamongo pii lamaiya. Baame Isaraele wambunya lenge kambu dokona dopa leya. Neta, yuu Gipione kanda kanda dokona mee rao kara. Kana, yuu Ainjalone rapu dorena kanda kanda mee rao kara.

¹³Isaraele wambu dupwame ene wini pinya piyaminyi dokopa neta kanape dolapo mee romo pii nao rao karalu kareyambi. Dopa piyamo dokopa yake suku dokona neta mee rao karalu kareya. Dopa piyamo dokopa yuu yangama piso pao yuu kukwa opetaeko rao karalu kareya. Dopa piyaŋa lao Akali Rolae Pingi Dupwana Buku dokona pyasi palamo.

¹⁴Yuu wamba kanda soo dokopa piso pao epapupi yulu dopale pyuo Kamongome mee akalinya pii mendepe warombo see nange. Isaraele wambu dupwame yanda pyuo kareyaminyipa Kamongome nakama poraiyuo nyiso kareyamo piyami.