Joni 9:16-32

¹⁶E'ina hu'negu mago'a Farisi vahe'mo'za anage hu'naze, e'i ana nera Anumzamo'a huntegeno ome'ne, na'ankure mni fruhu kna ana ne'mo kegva nosie. Hianagi mago'amo'za anage hu'naze, inankna huno kumi ne'mo'a amanahu kaguvazana erifore hugahie? Anage nehu'za keha're'za amu'nompinti vahera refko hu'naze.

¹⁷Ana hute'za mago'ene avuma asu hu'negenoma, eriso'e hu'nea nera antahige'za, na'ane hunka kavurgama eriso'e hu'nea nekura nehane? Ana ne'mo huno, Agra kasnampa nere.

¹⁸Jiu kva vahe'mo'za, avurga asu osu'nea neku nehaze, nehu'za zamentinti osu'za, ana ne'mofo nererane nefane znagi hu'naze.

¹⁹Zamagra nererane, nefane znantahige'naze, ama'i mofavrea avu asuhu'negeta ksente'na'o? Hanki inankna huno menina avua nege?

²⁰Nererake, nefake kenona'a anage hu'na'e, Tagra antahi'no'e, ama tagri mofavre, avu asu hu'nea ksente'no'e.

²¹Hianagi tagra antahita keta osu'none, menima avuma negea'zane, aza avua eri so'e hunte'neo ontahi'no'e. Agra ra vahe mani'neanki, antahigenkeno agra tmasmino.

²²Nererake nefakea amanahu kema hu'na'ana, na'ankure Jiu mono kva vaheku koro huke anage hu'na'e. Na'ankure Jiu mono kva vahe'mo'za ke retro hu'za, mago'mo Jisasinku Kraisi'e huno, huama hanimofona, Jiu mono nompinti (Sinagog) ahe natigahune, hu'naze.

²³Ana ke agafare nererake nefakea huke, agra ra vaheki agri antahigeho hu'na'e.

²⁴Ete mago'ene, ko'ma avu asuhu'nea ne' agi hu'za asmi'naze, Anumzamofo avure tamage hunka huo, kavu eri hari hu'nea nera, kumi ne' mani'negeta tagra antahi'none.

²⁵Ana ne'mo anage hu'ne, nagra ontahi'noe Agra kumi ne' mani'neo, magoke'zama nagra antahi'noana, navua asu hu'neane, hagi menina navu negoe.

²⁶Anante Farisi vahe'mo'za asmi'za, Jisasi'a nankna'za kagrira hugante'ne? Inankna huno Agra kavurga erihari hu'ne?

²⁷Avuma eriharima huntenea ne'mo anage hu'ne, nagra ko tmasmi'noanagi ontahi'nazo. Nahigetma ru'ene antahinakura nehaze? Tamagra nena Agri amage'ante disaipol naga maninaku nehazafi?

²⁸Zamagra ana kemofo nona'a knara kefinti fra vazinte'za, kagra Agri amage nentana disaipol ne' mani'nananki, tagra Mosese amage nentona vahe mani'none!

²⁹Anumzamo Mosesena kea humigeta tagra antahi'none, hianagi ama'i nera igati e'neo, tagra ontahi'none.

³⁰Ana ne'mo anage huno zamasmi'ne, ama ruzahu'zama hu'nea nera, Agra igati eno, navurga erihari hige'na ke'noe, tamagra ontahi'naze!

³¹Tagra antahi'none, kumi vahera Anumzamo'a antahi'nomie, hianagi iza'o mono hunenteno Agri amage' ante fatgohani'mofona, Anumzamo antahiamigahie.

³²Mona mopa fore hu'nea knareti, avu asu hu'nea vahera mago ne'mo'e huno avurga eri hari hie kea ontahi'none.