Joni 3:19-36

¹⁹Nanekema huzmante'siana, ama kemofo agafare huzmantegahie. Msamo'a ama mopafima efregeno'a, vahe'mo'za hni avu'ava'zanku avesinente'za msamofona avesi onte'naze. Na'ankure havi zamu'zmake'za hu'naze.

²⁰Aza'o hvizama nehia vahe'mo'a, tvi'mofona zamesra hunente'za, msarera nomaze. Na'ankure haviza nehazazamo eama huzanku nomaze.

²¹Hu'neanagi aza'o tamage avu'ava'ma nehimo'a tvitera egahie. Na'ankure hakaremo'za nege'za Anumzamofo avenesiaza nehie hu'za hugahaze.

²²Ananteti Jisasi'a amage nentaza disaipol naga'ane, Judia kaziga vu'za vahe'ene mago'a kna umani'ne'za mono tina fre zamante'naze.

²³E'i ana knafi Joni'a, Salim kumamofo tava'onte Ainoni kumate mono tina frezmante'ne. Na'ankure anantega rama'a tina me'nege'za vahe'mo'za ete'vute hu'za mono tina fre'naze.

²⁴Na'ankure Jonina kina huonte'naza knafine.

²⁵Ana nehzage'za Jonima amage nentaza disaipol naga'ane, mago Jiu ne' ene, Juda vahe'mokizmi avu'avapi ti fre'za avu sese nehaza zanku keaga hu'naze.

²⁶Nehu'za Joninte e'za amanage hu'za asmi'naze. Hurami (Rabbai) ne'moke, Jodan timofo kantu kaziga kagrane mani'neama, Agri agi hu'ama hu'nana ne'mo'a, mono ti fre nezmantege'za mika vahe'mo'za Agrite nevaze.

²⁷Joni'a anage hu'ne, mago vahe'mo'a, mago zana e'origahie, ana hugahianagi monafinkati mago'zama amisigeno'a amne erigahie.

²⁸Tamagra tmi antahi'nage'na amanahu kea hu'noe, Nagra Kraisi'na omni'noe hu'na hu'noe. Hianagi Agrira azeri henka atreno, nagrira pusante hunantege'na e'noe.

²⁹Mago vemo'ma a'ma erinaku nehigeno rone'amo oti'neno antahi nemino, aravema huku hia vahe'mofo ageruku muse nehie, e'ina higu nagrira muse zamo'a avite'ne.

³⁰Agri agimo mreri anagamu atresigeno, nagri nagimo uramisie.

³¹Agra anagamiti e'nemo'a maka'zana agtere'ne, aza'o ama mopafinti'ma e'nesimo'a, ama mopafi vahekino, ama mopafi zankuke kea hugahie. Agra aza'o monafinkati'ma e'nemo'a, Agra maka'zamofona zamagtere'ne.

³²Agrama antahino keno hu'nea zante Agra naneke'a huama nehie, hianagi mago'mo'e huno agi agenke'a antahi anira osu'naze.

³³Iza'o, Agri agi agenke'a erimo'a, tamage huno Anumzamofo nanekegura nehie.

³⁴Na'ankure Agrira Anumzamo huntege'no e'neankino, Anumzamofo keaga nehie. Na'ankure Agra refko osuga'are Avamura aviteno ami'ne.

³⁵Nefa'a, Nemofona avesinteno mika'zana kva hugahie huno, Agri azampi ante'ne.

³⁶Aza'o Nemofonte amentinti hanimo'a manivava asimu erigahie. Hagi iza'o Nemofo kema rutagresimo'a asimura e'origahie. Hanki Anumzamofo tusi'a rimpahe knazamo agrite megahie.