Jon 21:4-17

⁴Ifili kere lirkilau le epli laptu fale, Jisas fale lile tuluple linko plen wolo pupam pepe olo puluwo matufuwo kolo.

⁵Leye lo Jisas linape lepletei lirpolo, “Ko ise lainiyongou pepe ise yenglei men lo olo?” “Olo.” Pe namti pirpowo.

⁶Fei, Jisas lirpepeye, “Ise yiri taimere leise lualo nimpe teingo plen liti eti tilpi le ise ma yengleipe ningu nemple.” Le pe so piri taimere lualo tipe wolo pe miso nou peipi lau yuwei kolo wusoli ningu olo wurutei le pe pire taimere moingi.

⁷Pupane wuso Jisas onom puwoltei liri lepe, le lirpowo Pita lolpepei, “Ko le kuna ili louku.” Wem Saimon Pita lingitepe il wuso pirpei pirpolo, “Le kuna ili louku,” le frou kapi olongou pele lafo, (wusoli le nomplei tani, pau yawi) le le konko lualo tipe.

⁸Pupam nemple pepe, pe pifei nimpe teingo le pe peipepi taimere lire ningu pila pe fale telmane plen. Pe puwo tipe fiyen kolo, olo pe malfem pire telmane lite tuluple mingo plen.

⁹Wem pupam pepe kotu pualo pe telmane mingo, pe puluwo weli nele loli lato le ni nele lire luwom tuwo weli lepe.

¹⁰Le Jisas lirpepe lolpepei, “Kapi ningu nemple wuso fei yengleipe pepe yilape yau.”

¹¹Saimon Pita longlo nimpe teingo le le leipi taimere lire ningu lilape le telmane mingo. Taimere lepe fale lire ningu, lipiye yaupe le pe wurutei (153) wolo taimere re olo kere kolo.

¹²Fei, Jisas lirpepe pupam pepe lolpepei, “Ise yau yaplei.” Pupane nele re leletei Jisas lirpolo le minele, olo wusoli pe pretai le ili lelpe.

¹³Jisas le kali luom lire ni lepe watepe.

¹⁴Wem fei lepei, le wem twinges niliye piti Jisas falepe pupam pele, wem le la fei le Ma Ili nou leila.

¹⁵Pupam pepe paplei re fei, Jisas lirpowo Saimon Pita lolpepei, “Saimon, ninge lite Jon, ye inuwepe pupam pepei piti ye onom puwoikitei lom?” Le Saimon Pita namti lirpowo Jisas lolpepei, “Iyo, ili leiki. Ye retai piti ki onom puwoye.” Jisas nou lirpowo lolpepei, “Mete peiki wuso watafei sipsip eple peiki pepe ye ma untoluwepe.”

¹⁶Jisas nou lirpowo Saimon, linu lirpowo le le fei nou lirpowo le ma wem twinges, lirpowo lolpepei, “Saimon, ninge lite Jon, ye onom puwoiki lo olo?” Le Saimon Pita namti lirpowoye, “Iyo, ili leiki, ye retai ki onom puwoye.” Fei, Jisas lirpowoye, “Ye untoluwepe sipsip peiki.”

¹⁷Jisas nou lirpowo, wem fei lepei le wem twinges niliye piti Jisas lirpowo Saimon Pita. Jisas lirpowoye, “Saimon, ninge lite Jon, ye onom puwoiki lo olo?” Pita onom one wusoli wem twinges niliye fei Jisas leletei lirpolo, “Ko ye onom puwoiki lo olo.” Liso Saimon Pita lirpowo Jisas lolpepei, “Ili leiki, ye retape men nange yeflipiye. Ye retai piti ki onom puwoye.” Jisas lirpowoye, “Ye untoluwepe sipsip peiki.