Yoane 21:4-17

⁴Ana pogos nap̃a yemlagi merarava ruru ke narui, Yesu patom su ura e nene, ana mepisu sane sa ga yar tai ne sike ne, ana pe mepisulup̃ar re poli mesape naga ke narui.

⁵Ana Yesu pion pan imimi, piunia sape “?Naruu lala, ap̃ar m̃a ika lap̃asia, po pere?” P̃isi na mesape “Peraga rui.”

⁶P̃isi na pisa, pisape “Pogaga, akila sanini. Ava akuan si lilivi, ana ve akuan re si sa nap̃a akuan ke ne, alup̃arli va e lepas na p̃amarua sumo wa, ana nekilia nesape yoko atol ika p̃asia.” Ana pe mepisu kilale re poli wa sane Yesu na pis ke ne, ana mepa melup̃ar lilivi sa ga nap̃a naga pisa. Ana veraga ga pulen ga ika na ika, ana pogos nap̃a mesape mourelua va metava mep̃ure p̃ele ga, pulen manene la ika lala.

⁷P̃isi na mepisu kilale narui mesape Yesu, ana inu nap̃a imimi lua Yesu sane mepe puruvi, nepisa pa Saemon Pita, nesape “Pita, ovisuia, Sup̃e nam̃a!” Pogos nap̃a Pita mloge sane na, sum̃alu veraga, miyen sina ga m̃ana kulkota, pula tano e sive, miye pa ura.

⁸Pe mesu re perinan ura poli, sur sane tasme ponotia taaga ga 100, ana Pita sumon imimi mokus waa mesirau mopure yalolog ke lilivi nap̃a pulen ika.

⁹Ana pogos nap̃a mepim ura, mepisu kap tai mom̃a ga, nap̃a amlega ika p̃asia e mopulusia, mepisu narin kilaparavi lap̃as manoa ruru pa sike rui.

¹⁰Ana Yesu pisa, sape “Ika la nap̃a amiu ap̃ar ga na wa, awar p̃as vam ve kata.”

¹¹Ana Saemon Pita pitove, pa metava e waa, p̃erelua lilivi, p̃ere pimi ura. Ika mok pap̃isi, memaraun mesape sa p̃isi lilivi wororowa lawea, ana peraga, mep̃ere pimi pogaga. Pogos nap̃a mop̃ar plan ika la nene, mopuloia tol ponotia taaga lualima yam lima pa telu 153.

¹²Ana pogos nap̃a ika la manoa ruruia, Yesu pio, sape “Aimi akinana.” E pogos nene mepisu kilale ruru mesape Sup̃e ga nene, pe mesitom re si meviun mesape naga ai.

¹³Mepim mesike pa lele taaga narui, Yesu mla kilaparavi, pion pan imimi, amio m̃ena ika lala, ana makania.

¹⁴Naga nene sane pe Yesu kiena navaemeena natelu pan imimi kiena nalogena lala, siraun nap̃a Ntewa tamalia sina naga petan marena.

¹⁵Ana pogos nap̃a memla pae kamimi kinanena na kolulag, Yesu pisape sun re amio Saemon Pita. Piun tania, sape “Saemon, narina ne Yoane, sanape? ?Ko na sinem̃a sii inu keviu, taulu nap̃a la nene sinela sii inu, po peraga?” Pita pisatam̃e pania, sape “Sup̃e, sur nene okilia pa rui, nekekaran ko pap̃isi.” Ana Yesu pisa pania, sape “Pogaga, ovagan narin kiau sipsip lala.”

¹⁶Pogos tap̃ena sina ga, Yesu pisa pania, sape “Saemon narina ne Yoane, ko na sinem̃a sii inu po pere?” Pita pisatam̃e ke sina, sape “Sup̃e, sur nene okilia rui. Sa nap̃a nepisaaria, nekekaran ko pap̃isi.” Ana Yesu pisa pania, sape “Pogaga, ovisuar kiau sipsip lala.”

¹⁷Ana yam si tai, kila yam telun narui, Yesu piunia, sape “?Saemon narina ne Yoane, ko na okekaran inu kemua lelaga, po peraga?” Ana pogos nap̃a Pita pisu Yesu piun m̃a sanene pano tol yam telu, mloge piowa, pisa pa Yesu sape “Sup̃e, ko okilia make sur punu ga, okilia nap̃a nekekaran ko pap̃isi.” Ana Yesu pisa pania, sape “Pogaga, ovagan kiau sipsip lala.