15Pharisee-el-rnem artwa renh ayernek, “Nthakenh ntwa mwerr-anem anngel-atherr areyel-anem?” Artwa aparrng-penh ra tyernek, “Jesus-el ayenh annga apernek atnthel apelh-penhel. Ikwer-penh ayeng kwaty Siloam-itwek inngerr lhewelhek. Ikwer-penhan atha annga rlkemel-anem arek.”
16Rernem ilterrenh ikwer-they. Pharisee ingwer-rnem angkerrek-anem, “Artwa rarl artwa nhenh mwerrilekan arlta Saturday-el, ltyerrey-angker impen ikwerel. Alakenh apmwarl! Ra Ingkart-kenh angkakert-wenyarl!” Pharisee ingwer-rneman angkerrenh, “Artwa ra angkakert Akngey-kenh apek, mwerr-angkwarrarl.”
17Pharisee-rnemel artwa renh ayernek arrpemarl, “Nthakenh ngan angkem, artwa rarl annga atherr ngenh mwerrilekek?” Artwa ra tyernek, “Artwa yanhan Akngey-kenh angkakertarl.”
18Pharisee-rnem ikwer irrpeltherrenh, irrtywerrerl-anenty-arrpantey. Ra ikwer-rnem ilelhek arratyarl, rarl ampa akelyank aparrng anenh. Rernem amikw-then aynikw-then ikwer-atherr yangkelek, ratherr artwa ikwer-penh iletyek.
19Ratherr apetyek. Pharisee-el-rnem renh-atherr ayernek-anem, “Nhenhang alerengkw mpwelekanthenh? Arratyang mpwelanth ileyel, akelyank-antey ra aparrng anenh? Alakenh mpwelanth ileyel, nthakenharlap ra areyel-anem?”
20Ratherr tyernek, “Ya wenh, kel aylekanthenh. Arraty ra aparrng akelyank anenh.”
John 9
John 9:15-20