John 6:1-20

¹Atta wile, Jedus cross back oba Lake Galilee (wa some call Lake Tiberias).

²A big crowd ob people beena folla Jedus, cause dey see dem miracle wa e done wen e mek de sick people well.

³Jedus an e ciple dem gone op ta a mountain an seddown dey.

⁴De time fa de Jew Passoba Feas been close.

⁵Wen Jedus look roun, e see de big crowd ob people da come ta um, so e aks Philip say, “Weh we gwine buy bread nuff fa feed dem people?”

⁶Jedus say dat jes fa test Philip fa see wa e gwine do. Cause Jedus done been know wa e gwine do.

⁷Philip ansa Jedus say, “Fa gii all ob dem eben jes a leetle bit fa nyam, we gwine haffa hab mo den two hundud silba coin fa buy de bread.”

⁸Den noda one ob Jedus ciple dem, Andrew, de broda ob Simon Peter, say,

⁹“Dis leetle boy yah got fibe baaley bread an two fish. Bot dem ain gwine be nuff fa all dem people yah, ainty?”

¹⁰Jedus tell e ciple dem say, “Oona mus tell de people fa seddown.” Plenty grass been dey, so ebrybody seddown. Dey been roun fibe tousan man dey.

¹¹Jedus tek de bread an tell God tankya, an den e gii out bread fa de people wa beena seddown. E do de same ting wid de fish. An all de people git all dey wahn fa nyam.

¹²Wen dey all been full op wid food, Jedus tell e ciple dem say, “Mus geda op all de leetle piece dem wa lef oba. Mus dohn waste nottin.”

¹³So e ciple dem geda all de leetle piece dem wa been lef oba fom de fibe baaley bread atta de people done nyam, an dey full op tweb basket wid bread.

¹⁴Wen de people see de miracle wa Jedus done, dey say, “Fa true, dis man de Prophet wa Moses say gwine come eenta de wol.”

¹⁵Jedus know de people been wahn fa come git um an mek um king, so e gone way gin, op eenta de mountain. E ain tek nobody wid um.

¹⁶Een de ebenin time de ciple dem gone ta de lake.

¹⁷Dey git eenta a boat an staat back cross de lake fa go ta Capernaum. Night come, an Jedus still ain come ta um.

¹⁸A big wind beena blow an de wata staat fa git rough.

¹⁹De ciple dem row bout shree mile wen dey see Jedus da waak pon de wata. E waak op close ta de boat an dey been mos scaid ta det.

²⁰Jedus tell um say, “Dis me! Mus dohn be scaid.”