John 4:12-52

¹²Chitamangidad i Jakob e pi’ e re luwed ney ngomad; ni ir nge pifak ni pumo’on, nge gamanman rok e yad gubin ni ur unumed e ran riy. Ma damur finey ni ga ba ga’ ngak Jakob fa?”

¹³Me fulweg Jesus ni ga’ar, “En nra unum e tiney e ran e ku ra yib e belel ngak bayay;

¹⁴machane en nra unum e ran ni gu ra pi’ ngak e dabki sul e belel ngak bayay. Ya ran ni gu ra pi’ ngak e ra ngal’ ni ba alublub u fithik’ i dow, ni ir e bay i pi’ e ran ngak nma pi’ e yafos, me pi’ e yafos ngak ndariy n’umngin nap’an.”

¹⁵Me ga’ar fare pin, “Ere mpi’ ngog e re ran nir, nge siy ki sul e belel ngog, mu gu pag e wub ngaray ko mel’ing ran.”

¹⁶Me ga’ar Jesus ngak, “Mman mpining e pumo’on rom ngam bow ngaray.”

¹⁷Me ga’ar fare pin, “Dariy e pumo’on rog.” Me fulweg Jesus ngak ni ga’ar, “Riyul’ e tin ni be’er ni kamog ndariy e pumo’on rom.

¹⁸Ya nga lal e pumo’on ni kam figirngiy, ma re mo’on ni gimew be par e chiney e dawori mang figirngim. Ere tin riyul’ e kamog ngog.”

¹⁹Me ga’ar fare pin, “Kug nang ni gur reb e profet.

²⁰Pi chitamag nu Samaria ni kakrom e ur meybilgad ngak Got u daken e re burey ney, machane gimed piyu Israel e ke lungumed e yu Jerusalem e eram e gin’en ni ir e ngu’ud meybilgad riy ngak Got.”

²¹Me ga’ar Jesus ngak, “Ppin, nge mich u wun’um e tin kugog, bayi taw nga ba ngiyal’ ni gathi bay ki meybil e girdi’ ngak e en ni Chitamangiy u daken e re burey ney ara lan yu Jerusalem.

²²Gimed yu Samaria e ri da mu nanged e en ni gimed be meybil ngak; ma gamad e Jew e gamad manang e en ni gamad be meybil ngak, ya kanawo’en min thap ngak Got e yib rok e pi Jew.

²³Machane re ngiyal’nem e ka be yib nike taw ngaray, ni pi’in nriyul’ ni yad be meybil e bay ra meybilgad ngak e en ni Chitamangiy u daken e ayuw ko Kan ni Thothup ngu fithik’ e yul’yul’. Ireray e pi’in yad ma meybil ni ba’adag e Chitamangiy ni ngar meybilgad ngak.

²⁴Ya Got e Kan, ma pi’in ni ngar meybilgad ngak e thingar ra meybilgad ngak u daken e ayuw ko Kan ni Thothup ngu fithik’ e yul’yul’.”

²⁵Me ga’ar fare pin ngak, “Gu manang ni fare Messiah nike lunguy e Kristus e bay yib. Ma ngiyal’ ni bay yib e bayi yog ngodad urngin ban’en.”

²⁶Me fulweg Jesus ngak ni ga’ar, “I gag ir, i gag e cha’ney ni gu be non ngom.”

²⁷Ka ngiyal’nem me sul pi gachalpen Jesus; miyad gin ngak ni kar pir’eged ni be welthin ngak be’ ni bpin. Machane dariy bagayad ni ga’ar ngak fare pin, “Mang e nge yag ngom?” ara ra fithed Jesus ni lungurad, “Mangfan ni ga be welthin ngak e re pin nir?”

²⁸Me digey fare pin e rume’ rok, me sul ngalan binaw, me ga’ar ngak e girdi’ u rom,

²⁹“Mired ngam guyed be’ nib mo’on nike weliy ngog urngin ban’en ni ug rin’. Gur i ir fare Messiah?”

³⁰Ma aram miyad chuw u lan binaw ngranod ngak Jesus.

³¹Ma ngiyal’nem e be wenig pi gachalpen Jesus ngak Jesus ni be lungurad, “Tamchib, mu koy ban’en!”

³²Machane me fulweg ni ga’ar, “Bay e ggan ni nggu way nda mu nanged bochu’uw i murung’agen.”

³³Ma aram me fith pi gachalpen yad u fithik’rad ni be lungurad, “Gur ke fek be’ e ggan i yib ngak?”

³⁴Me ga’ar Jesus ngorad, “Ggan rog e nggu fol ko tin ni be finey e en ni l’oegeg ku gub, ma nggu mu’nag e maruwel nike pi’ ngog ni nggu muruwliy.

³⁵“Bay bbugithin ni gimed ma yog nma lungumed, ‘Ka aningeg e pul me taw ko ngiyal’ nike el e woldug riy ni aram e ngan t’ar wom’ngin e woldug.’ Ma nggog ngomed ni ngam fal’eged i yaliy e yungi woldug: ya woldug ni bay riy e ke el nike taw nga nap’an ni ngan t’ar!

³⁶Re mo’on ni ir e nge t’ar e woldug e yima pi’ puluwon ni nge kunukunuy e woldug nike el ni fan ko yafos ndariy n’umngin nap’an; ni aram e re mo’on ni yung e woldug nge re mo’on ni t’ar e woldug e bay ra felfelan’gow u ta’bang.

³⁷Ya fare bugithin ni yima yog e ba riyul’ ni fa’ani ga’ar, “Be’ e yung, me t’ar be’ wom’ngin.

³⁸Ere kug l’oegmed ni ngam t’ared e woldug u daken bangi milay’ ni gathi gimed e mmuruwliyed; ya yugu boch e girdi’ e ra muruwliyed, ma gimed e kefel’ rogomed ko maruwel nra ted.”

³⁹Ma bo’or e girdi’ nu Samaria u lan e re binaw nem ni mich Jesus u wun’rad, ya keyog fare pin nike ga’ar, “Ke weliy ngog urngin ban’en ni ug rin’.”

⁴⁰Ere fa’ani yib piyu Samaria ngak miyad wenig ngak ni nge par rorad; me par Jesus u rom ni l’agruw e rran.

⁴¹Ma fini ku bo’or e pi’in ni michan’rad ngak ni bochan e thin rok Got ni i machibnag ngorad,

⁴²me lungurad ko fare pin, “Ke mich u wun’mad Jesus ni gathi bochan e tin ni kam weliy ngomad, machane bochan e kug rung’aged e tin nike yog, ma aram e kug nanged nri ir fa’anem ni nge thapeg e girdi’ nu fayleng ngak Got.”

⁴³Me par Jesus u rom ni l’agruw e rran, nge mu’ me chuw nge yan nga Galile.

⁴⁴Ma ir e ga’ar, “Ba profet e danir tayfan u lan e nam rok.”

⁴⁵Ma nap’an ni taw nga Galile me felfelan’ e girdi’ ngak nike yib ngorad, ya ranod ko madnom ni Paluk’af nga Jerusalem mra guyed urngin e tin ni rin’ ko ngiyal’ ni ba’aram ni un madnom riy.

⁴⁶Ma aram me sul Jesus nga Kana ni bay u lan yu Galile, ni ireram fa gin’em ni piliyeg e ran riy nge ngal’ ni wayin. Ma bay be’ nib tolang ko am u rom ni bay bochi cha’ ni fak u lan yu Kapernaum nib m’ar.

⁴⁷Fa’ani rung’ag nike yib Jesus u Judea nga Galile, me yan ngak Jesus nge yan i wenig ngak ni nge yan nga Kapernaum nge chuweg e liliy rok e chicha’nem ni fak, ni be chugur ni nge math e fan rok.

⁴⁸Me ga’ar Jesus ngak, “Dariy bigimed nra gu mich u wan’ ni fa’anra dab mu guyed e maang’ang ni ba ga’ ma bfel’ ni kug ngongliy.”

⁴⁹Me fulweg fare mo’on nib tolang ko am ni ga’ar, “Mu un ngog nga darow ndawori aw e fan rok fakag.”

⁵⁰Me ga’ar Jesus ngak, “Mman, ya dabki buch ban’en rok fakam!” Me pagan’ fare mo’on ko thin nike yog Jesus ma aram me yan.

⁵¹Ma nap’an ni ka be yan nga tabinaw rok miyad mada’ e pi tapigpig rok miyad yog ngak ni lungurad, “Ke muduwgil ndab ki buch ban’en rok fakam!”

⁵²Me fith ngorad e ngiyal’ ni gol fachi cha’ ni fak, me lungurad ngak, “Fowap ko ta’reb e kolok ni mithig yal’ me chuw e gowel u daken.”