John 2:4-19

⁴Jesus ikwer-warl angkek, “Menty. Alerl-antey. Ingwer-ingerant arlta atyenhel, atha ilek-ilek mpwaretyek, rernem ayenh iterl-aretyek-anem.”

⁵Amikwel warrkenh-rnem ilek, “Awelhenherr-arey ampa atyenhek, rarl arrenhantherrenh ilem.”

⁶Ampwal apwert-penh kwatyek-arelh ilkwernem rtnenh 6 warl kwenel, ingkerrenh-antey iltya lhewelhetyek, amern arlkwey-alenty, angka Jew-rnem-kenharl arrwekel ayntenh-angkwarr. Kwatyek-arelh ilkwa 100 litres-ek-arelh.

⁷Jesus angkek warrkenh-rnemek, “Kwaty inpenherr-arey ampwal-rnem-warl arriwek-atwety.” Warrkenh-rnemel kwaty inpek, ampwal-rnem-warl.

⁸Jesus-el warrkenh-rnem ilek arrpemarl, “Kwaty akely tyampit-warl thelenherr-arey, atyetyart ikwer-warl akngemel.” Rernem Jesus ikwer awelhek.

⁹Kwaty ra wayn-anem irrek, Jesus-angkwarr. Warrkenh-rnem rernem tyampit akely-warl thelek-penh, rernem waynek akaltyarl. Atyetyart ra kwaty akely-penh wayn-anemarl antywek, akwerrpel. Ikwer-penh atyetyart arlkek artwa anyent ikwer itengirrey-alenty ikwer.

¹⁰Atyetyart apal angkek, “Wayn nhenhan mwerr-angkerarl. Wayn mwerr-angker nga awakelhek ingkernant ingkerrenhel antywetyekarl! Wayn apmwamwam antywey-angenh arrangkw. Wayn irrkweny antywey-angenh. Ingwer-rnemel wayn mwerr-tangkwel anthetyek, wayn akngerr rernem antywetyek. Rernem wayn mwerr ywerrelhilenty, anwantherr wayn apmwa renh anthetyek.”

¹¹Jesus-el kwaty-penh wayn mpwarek tawen Cana-itwek apmer Galilee-ek, rlterrk ilkwakertel, kwertengerl ikwerenh-rnemel renh aretyek. Rernem Jesus renh tnakek-anem rlterrk ilkwakert.

¹²Arlta ikwer-penh Jesus tawen ilkwa Capernaum-warl alhek kwertengerl ikwerenh-rnem-akert. Amikw-then ayteyikw-rnem-then alhek ikwer-angkwarr. Rernem tawen Capernaum-itwek aney-alhek arlta irrpetyel.

¹³Arlta impen arrer-anem tyenkerr Anperarl Alhek “Passover” rernem arlkwetyek, Jesus kwertengerl ikwerenh-rnem-akert alhek Jerusalem-warl.

¹⁴Rap Jew-rnem-kenh tyaty ilkwewarl aketh-ampeny-warl alhek Ra arey-alhek rernemarl pwelek-rnem yep-yep-rnem-then thip rwelyarr-rnem-then tharlemilenh. Ra arek artwernem man-angketyarr taypel-itwek anerl-anenty, man change akngerr-akert.

¹⁵Jesus ra arek-penh, ra ikwer-rnem ahelirrek, rernemarl apmwel-areth Akngey-kenh warl-itwek tharlemilenh aker ilek-ilek. Whip ra mpwarek rwep-penh. Artwernem tyaty-they ra irrentek yep-yep-rnem-then pwelek-rnem-then, taypel-rnem akngartewemel, man-angketyarr. Man arlperrty iwek.

¹⁶Artwa thip-akert-rnemek ra arlkek, “Thip-rnem arleng akngeynenherr-arey! Nhenhan Akngey atyenh-kenh warlarl. Arrantherr store-anem arrernek apmer nhenh-itwek apmer impen Akngey-kenh!”

¹⁷Kwertengerl-rnemel awek-penh, rernem iterl-arek angka Akngey-kenh arrwekelenyarl ayntenh, “Ayeng arraty iterreyel warl ngkwenhek, warl menty artelh-aynteyek. Ayeng ahelirrek apmwel-aretharl-anem anew-anenh, angka Akngey-kenh iley-angker.”

¹⁸Jew-rnem-kenh atyetyart-rnemel Jesus arek, rarl ingkerrenh irrentek tyaty ilkwethey, rernem apetyek renh ayernemel, “Akngeyelang ngenh ilanthek, ntwa ingkerrenh tyaty ilkwethey irrentetyek? Arrangkw apek.” Rernem alakenh renh ayernek, ikwer irrpeltherremel.

¹⁹Jesus-el renh-rnem tyernek, “Arrantherr tyaty renh atakenty, atha angkep arrpemarl arteyenh ingwa atherr-penh.” Atyetyart-rnemel Jesus-kenh angka iterl-arey-angenh. Rernem apal angkerrenh tyatyekang angkerl-anentyek-athen. Ran ingwer-angkwarr angkek. Ran arraty ilelhey-angenh, ingwa atherr-penh ra itetherrenhey-alpeyenh, arlka mwerr-akert-anem. Atyetyart Jew-rnemel renh ilek, “Nthakenh ntwa warl renh angkep arteyenh arrpemarl ingwa atherr-penh? Warrkenh-rnem aherrety 46-ek-atwety warrkirrenh awank-akerr, tyaty nhenh artetyek!”