John 15:1-21

¹Jesus ilelhek, “Ayeng arwerl grapes rarl. Akngey atyenh ran amern grapes arntarnt-arey-angker-apeny.

²Waly amern-akert-rnem mentyarl arem. Waly-rnem amern-weny-rneman ra akalthemel iwem, waly ingwer-rnem amern-akert-rnem irretyek.

³Mwerr arrantherr arraty aneyel, angka atyenh-angkwarr ayntarrp-iley-angenh.”

⁴“Atyeng-itwel ana, ayeng arrekantherr-itwel anem arrpemarl. Waly akenty ra arlenyirrem, arrangkwarl. Alperr amentirrenty, amern aney-angenh-anemarl. Arrantherr amentirrenty atyengety arrantherr arrangkwarl, atyeng-angkwarr apentey-angenhan.

⁵Ayeng arwerl grapes-apeny, arrantherr waly-rnem-apeny. Atyeng-itwel arrantherr anenty, ayeng arrekantherr-itwel anem arrpemarl, arrantherr arraty-angkwarr aneman. Atyeng-angkwarr aney-angenh ayeng arrekantherr-itwel aney-angenh arrpemarl.

⁶Ingwerenty atyengety amentirrenty, ra apmwirreyenh, alperrarl apmwa arlenyirrem-apeny arrangkw. Warrkenh-rnemel alperr arleny-rnem rwewarl iwem-apeny.

⁷Arrantherr atyeng-angkwarr apententy, angka atyenh iterl-aremel awelhenty, ayeng arrekantherr awelh-ayntem arrpemarl, arrantherr atyeng ayernenty, athap arrenhantherr arntarnt-arayntem.

⁸Arrantherr arraty-angkwarr apententy, ingkerrenhel Akngey renh iterl-arem tnakemel, ran rlterrk inngarl aneyel.

⁹Ayeng arrekantherr ilkelheyel, Akngey atyeng ilkelheyel-apeny. Ayeng arrekantherr ilkelheyel, Akngey atyeng ilkelheyel-apeny. Atyengety intwemelirrey-angenh, intem-antey apenterl-ayntetyek.

¹⁰Ra atyeng ilkelheyel, ayeng ikwer awelheyelarl. Ra nthakenh atyengety intwemelirrey-angenh. Ayeng innga arrekantherr ilkelheyel irrkaty-angkwarr-antey. Arrantherr atyeng awelhenty, ayeng arrekantherr-itwel anem, arrekantherrety intwemelirrey-angenh.

¹¹Atha arrenhantherr ilek, arrantherr irrngerney anayntetyek ayeng aneyel-apeny. Ayeng ilkelheyel, arrantherr irrngerney innga anayntetyek.

¹²Nhenhan angka atha arrekantherr intem-antey arrernek: Ayengarl arrekantherr-itwel mwerr-angkwarr aneyel-apeny, arrantherr ingwer-rnem-then mwerrant-arey anayntetyek.

¹³Alakenh-anyem artwa ra ikwerenh-rnemek artewentyel ilkelheyelarl, rap arlka menty anthelhem, ikwer-rnem katy ilwetyek, renh-rnem itethiletyek.”

¹⁴“Arrantherr angka atyenh-angkwarr apententy aleth-antey, arrantherrap atyenh-rnemarl anem.

¹⁵Lyertan atha arrenhantherr itnewem atyenh-rnem-anemarl. Aleyan arrantherrarl iterl-areyel angka atyenh-angkwarr, ayengan iterreyel-angkwarr. Arrantherran warrkenh-weny-anemarl. Atha arrekantherr angka ingkerrenh ilek, Akngey atyenhel ayenh ilek-apeny. Warrkenh-rnemel atyetyart-kenh angka ingkerrenh iterl-arey-angenharl, rarl iterreyel-angkwarr.

¹⁶Arrantherr ayenh arrerney-angenh, atyetyart arrekantherr anetyek. Atharl arrenhantherr ayerrpilek, atyenh-rnem anetyek. Atha arrenhantherr ayerrpilek, arrantherr Akngey-angkwarr warrkirr-ayntetyek intem-antey. Arrantherr Akngey ayernenty atyeng-angkwarr, Akngeyel arrekantherr awelhemarl.

¹⁷Atha arrekantherr ileyel arrpemarl, angka nhenh aynteyel-angkwarr: Arrantherr mwerr-angkwarr anayntetyek, artewentyel ilkelh-ayntetyek ingwer-rnemek.”

¹⁸Jesus kwertengerl-rnemek angkek arrpemarl, “Ingwer-rnem ahern nhareny-rnem arrekantherr ilkelhey-angenharl. Iterl-arayntenherr-arey, arrwekel-antey rernem atyengety arlkarirrenh-apeny.

¹⁹Arrantherr ahern-areny-kenh-angkwarr apententy, ahern-areny rernem arrekantherr inkwerelhemarl. Arrangkw. Atha arrenhantherr ingkerrenh ayerrpilek atyenh-rnem-anem. Alakenh-they rernem arrekantherrety arlkarirreyel. Arrantherrap ikwer-rnem-kenh-wenyarl.

²⁰Iterl-arenherr-arey, atharl arrenhantherr arrwekel ilek. Artwa warrkenh anem, ranap atyetyart ikwerenh-angkwarr ilkwewenyarl arrangkw. Ahern-arenyel ayenh atwetyek arrkernelhem. Irrkaty-angkwarr rernem arrenhantherr atyenh-rnem atwetyek arrkernelhem arrpemarl. Ingwer-rnem angka atyenhek awelhek, atharl ikwer-rnem ilek. Irrkaty-angkwarr rernem arrekantherr awelhem, arrantherran angka ikwer-rnem ilenty.

²¹Ahern-areny-rnem rernem apal anenh, Akngey renh iterl-arey-angenh, rarl ayenh thwenek ahern nhenh-warl. Arrantherran atyenh-rnemarl. Rernem arrekantherr irrpelthirrem arrpemarl, atyeng irrpelthirrenh-apeny, ikwer-rnemant awelhetyek.