Johannes 5:5-15

⁵Eman mwän a nom ikenan, a sasamau lon ükükün ilik me walu ier.

⁶Lupwen Jesus a küna ätewe lon an kokon o a rong pwe a sasamau lon fansoun langatam, a aisini, “Ka mochen küna pöchökül?”

⁷Ewe chon samau a pölüeni, “Ai samol, esap wor rei eman aramas epwe uweieila lon ewe koluk lupwen a nono. Nge lupwen üa sotuni ai üpwe tolong lon, eman a fen akom mwei.”

⁸Iwe, Jesus a üreni ewe mwän, “Kopwe ütä, angei kiom o fetal.”

⁹Lon ewe chök otun ewe mwän a pöchökületä, a angei kian o a popuetä le fetal. Ei a fis lon eu ränin sapat.

¹⁰Iei mine ekewe nöüwisen chon Juta ra üreni ewe mwän mi pöchökületä, “Ikenai ewe ränin sapat, esap pwüng ngeni allükün ach lamalam pwe kopwe uwei kiom.”

¹¹Iwe, a pölüeni, “Ewe mwän mi apöchökülaeitä a üreniei pwe üpwe angei kiei o fetal.”

¹²Iwe, ra aisini, “Iö we a ürenuk pwe kopwe angei kiom o fetal?”

¹³Nge ewe mwän mi pöchökületä esap silei Jesus, pun a wor chomong aramas lon ewe leni o Jesus a chök anifila seniir.

¹⁴Mürin chök ekis fansoun Jesus a küna ewe mwän lon imwenfel o a üreni, “Kopwe rongorong, iei ka pöchökületä, kosap chüen föri tipis, pwe esap fis ngonuk och mi ngau seni ei.”

¹⁵Mürin ewe mwän a feila o üreni ekewe nöüwisen chon Juta pwe Jesus ewe a apöchökülätä.