Joan 1:39-51

³⁹Ikanti Jeso: —Atsi tsame pineaigakerora. Impo iaigake ineaigakerora imagakera ovashi imagimoigakeri, ataketari inanai shavini poreatsiri.

⁴⁰Paniro giatanakeririra Jeso inti irirenti Sumo Perero ipaitaka Anturishi.

⁴¹Irirori iatake ikogakerira irirenti impo ineakerira ikantiri: —Noneaigakeri Meshiashi (onkantakera: “Kirishito”).

⁴²Impo itentanakari inakera Jeso. Iroro ineavakerira ikamagutavakeri ikantiri: —Vinti Sumo, itomi Joan. Maikari maika ariokya pimpaitaempa Sepashi (onkantakera: “Perero”).

⁴³Impogini okutagitetamanaira iatake Jeso Garireaku. Impo ario kara ineakeri Jeripe ikantiri: —Tsame pogiatanakenara.

⁴⁴Yogari Jeripe onti itimi Vetsairaku itimira Anturishi intiri Perero.

⁴⁵Impogini iatake ikogakerira Natanaeri. Iroro ineapaakerira ikantiri: —Noneaigakeri yoga itsirinkakotanakerira Moiseshi pairani intiegiri aikiro pashini kamantantaigatsirira. Irirori inti Jeso Nasarekunirira, itomi Jose.

⁴⁶Ikantiri Natanaeri: —¿Matsi ikametitumaigiratyo Nasarekunirira? Ikantiri Jeripe: —Atsi tsameratyo pineakiterira viro.

⁴⁷Yogari Jeso iroro ineavakerira ikenapaakera Natanaeri ikanti: —Neri yoga iseraere kematsatasanotakeririra Tasorintsi. Irirori tera iramatagumatempa.

⁴⁸Ikanti Natanaeri: —¿Matsi tyara pineakenara kara? Ikantutarityo Jeso: —Noneakempiniroro pinakera otapinaku igera tekyara inkantakitempi Jeripe.

⁴⁹Ovashi ikantanake irirori: —Gotagantatsirira, vinti Itomi Tasorintsi, vinti Igoveenkariegite iseraereegi.

⁵⁰Ikantiri Jeso: —¿Iroro pikemakera nokantakempira noneakempi otapinaku igera pagapagero pogakero pikantakenara maika? Impogini pineagetanake pashini pairorira avisagetakero oka.

⁵¹Impo ikanti aikiro Jeso: —Maika nonkamantasanoigakempi, impogini pineaigakero inkite ashireanakempara. Yogari isaankariite Tasorintsi iraguitashitapiniigakeri Kañotasanotakaririra Matsigenka.