João 4:3-23

³Morara kary totase Jezu a ahtao, Jutea poe toytose Karirea pona ropa.

⁴Samaria esemary ae toytose ynororo typoetory tõ maro.

⁵Mame Xika pona toeporehkase toto Samaria rãnao moro pata kynexine. Moe pyra tupito, Jako nekarohpyry tumũkuru tupime, Joze tupime.

⁶Jako tunahpyry moroto kynexine. Mame tãxiahtao toehse ahtao typorohse Jezu. Tuna ẽ pũtokoxi typorohse ynororo, typenekehse toytory poko toexiryke.

⁷Morarame nohpo tooehse, Samariapono, tuna anỹse. —Ajohpãme sã tuna anỹko jokuru, tykase Jezu eya.

⁸Pata pona toytose ipoetory tõ osemazuhme tonahsẽ epekahse.

⁹Mame ynara tykase nohpo Jezu a, —Juteume mase Samariapõ ase. Oty katohme mã tuna ekaropõko ya? tykase nohpo eya. (Toipe juteu tomo tytamurukõ omi poe imehnõ otuhtopõpyry aka otuhpyra toto.)

¹⁰Ynara tykase Jezu eya, —Ritonõpo nekarory onenetupuhpyra mase. Jenetupuhpyra roropa mase. Tonetupuhse oya jahtao, “Oya hko tuna se ano,” mykary ya. Mame tuna kurã ekarory oya soesoekane panõ ekarory oya, orihpyra oehtohme jũme, tykase Jezu nohpo a.

¹¹—Yrome moe tuna. Tuna puimatoh pyra roropa mase. Otokoinohxo ke morohne rĩko ma rokẽ?

¹²Seny kytamurukõ nahkahpyry rokene tuna eny, tykase nohpo eya Jako nahkahpyry poko. —Sero tuna tõse eya, ipoenomo a, eky tomo a, enara. Kytamurukõ motye hmahno? tykase nohpo eya, tõturupose.

¹³Ynara tykase Jezu eya, —Sẽ tuna enyryhtao oya ise ropa exĩko mase,

¹⁴Yrome ynekarohpyry enyryhtao oya tuna se pyra ropa mase exĩko jũme. Ynara exiryke, ynekarohpyry oya soesoekane sã exĩko okurohtao mana. Moro pokoino orihpyra exĩko matose jũme, tykase Jezu eya.

¹⁵—Ynara ãko oya hano, tuna se pitiko oya hano, jũme tuna se pyra ropa jehtohme, typenekehse jexiryke tuna puimary poko, tykase nohpo eya.

¹⁶—Onio ikohmata, tykase Jezu eya. —Imaro osehko ropa, tykase.

¹⁷—Tynioke pyra reh ahse, tykase, tozuhse eya. —Ajohpe pyra mase. “Tynioke pyra ase,” mykano.

¹⁸Oniõpyamo 5me turumekase oya. Mokyro onio seromato onio nymyry kara. Ajohpe pyra ro mase, tykase Jezu eya.

¹⁹—To! Urutõme mase Ritonõpo poe, tykase nohpo eya morara kary etaryke tyya.

²⁰—Toiro joturupory se ase oya. Oty katohme juteu tõ Jerusarẽ po rokẽ Ritonõpo poko atãkyemãko toh nae? Yna tamuru tõ sero Samariapõkõ mõ ypy pona rokẽ oturuse ytose toto, tykase nohpo Jezu a.

²¹Ynara tykase Jezu eya, —Etako pahne, okynã pyra sero Samaria po rokẽ pyra Ritonõpo poko atãkyemãko matose. Jerusarẽ po roropa sero ro saaro exĩko mana.

²²Samariapõkõ matose. Oneahmahpyrykõ onenetupuhpyra matose. Yrome yna juteu tõ asã xine pyra. Ritonõpo waro ynanase juteu tõ poe seropõkõ kurãkane tõtumakase exiryke.

²³Okynã pyra Ritonõpo zuzenu poe Ritonõpo eahmãko mã toto, zae Ritonõpo omipona se toexirykõke. Mokaro se mã Ritonõpo, tõmipona nymyry exiketõ se.