João 2:8-15

⁸Kỹ tóg ag mỹ: “goj tag tỹ festa to pã'i mỹ ven,” he mũ. Kỹ ag tóg ke mũ.

⁹Kỹ tóg kron mũ, festa to pã'i ẽn ti. Hã ra tóg tỹ vinho nĩ sir, ag tỹ run ja ti. Hã ra tóg ki kagtĩg nĩ, festa to pã'i ti. Ũ tỹ festa ki rĩr tĩ ag hã vỹ ki kanhró nỹtĩ, pã'i ẽn krẽm ke ag. Pã'i tỹ vinho hã ẽn kron kỹ tóg ũn prũg mũ ẽn jé prẽr mũ. Kỹ tóg ti mỹ:

¹⁰“vẽnh jykre vẽnhmỹ han ã,” he mũ. “Ag tỹ kronkron vén kỹ ã tóg ag mỹ vinho há tãvĩ nĩm ke mũ vẽ, kar kỹ vinho pãgsĩ vỹ há nĩ vẽ. Jãvo ã tóg ag mỹ vinho pãgsĩ ẽn nĩm vén, kỹ ã tóg vinho há pẽ tag nĩm sór mũ ha vãhã,” he tóg, festa to pã'i ti, ũn prũg mũ ẽn mỹ. Hã ra tóg ki kagtĩg nĩ, Jesus tỹ goj tỹ vinho há ẽn han mũ ti, há kỹ tóg ti mỹ e tĩ, ti tỹ festa kuju ki vinho há ven sór kỹ.

¹¹Jesus tỹ ẽmã tỹ Caná tá nén han mũn hã vẽ, Galiléia tá. Ẽg tỹ nén han ki kagtĩg hyn han tóg tĩ, kỹ tóg tag han vén. Ti tỹ nén han mũ ki ẽg tóg ti jykre tar ki kanhró nỹtĩ sir. Hã kỹ ag tóg ti ki ge mũ sir, ti mré mũ tĩ ag, ag tỹ ti jykre tar ẽn ven kỹ.

¹²Kar kỹ Jesus vỹ cidade tỹ Cafarnaum ra tĩ mũ, ti mỹnh fi mrẽ, ti jãvy ag mré hã, ti mrẽ mũ tĩ ag mré ke gé. Tá ag tóg nỹtĩg mág sĩ han.

¹³Ẽn kã Judeu ag festa tỹ Páscoa vỹ kakó nĩ ha Kỹ Jesus vỹ cidade tỹ Jerusalém ra tĩ mũ, ti mré mũ ti ag mré.

¹⁴Ti tỹ Topẽ jo ĩn tá jun kỹ tóg ũ tỹ boi vender he tĩ ag vég mũ, carneiro vender he tĩ ag ke gé sórãg vender he tĩ ag ke gé. Topẽ jo ĩn krẽm ag tóg ãjag negócio hyn han tĩ. Kar kỹ ũ ag tóg tá nỹtĩ gé jãnkamy trocar he tĩ ag.

¹⁵Jesus tỹ ag ve kỹ tóg ti mỹ e tĩ, ag tỹ Topẽ jo ĩn kavénh mũn kỹ. Hã kỹ tóg mrãn ke jafã fy tỹ ag mrãnmrãn jafã han mũ. Ẽn vyn kỹ tóg ag pan mũ, Topẽ jo ĩn kãtá, carneiro ti ke gé, boi ti ke gé. Ũ tỹ jãnkamy trocar he tĩ ag jãnkamy ẽn vãm tóg mũ gé, ẽprã, kỹ tóg ag mesa tỹ kréj ke mũ gé.