João 20:2-30

²Nikare waiya hoka tema xane Simão Pedro, háhare Jesus awaiyetitere xoaha ana hoka nexa ihiyeha: — Iyehenahita Xekohaseti Jesus háre exawatyakala akota hoka kala aliyo xamani ala xane mokahene — nexa Maria xakai ihiyeha.

³Nexa ihiyeha hoka Pedro hatya exaotyakirahare xoaha xane xawatyakalati nali.

⁴Tema xaneha, háhare atyo Pedro xahe winihare hoka tema xane hoka hatyo hotohare xane hikoa xawatyakalati nali.

⁵Xane hikoa hoka tanatyoakotya hoka imiti kese taosero waiyeheta hoka maisa atyo ijoita xawatyakalati ako.

⁶Enajikinita atyo Pedro xane hikoa hoka isoa xawatyakalati ako hoka waiyeheta imiti taose, nali tyaonita hoka.

⁷Jesus seri hiye olalihenahere taose haware tyaonita imiti linho taose eháre hiye olalihenahere nonitata.

⁸Hatyaoseta exaotyakirahare hetati xane hikoahenere tehitiya isoa hoka waiya. Waiya hoka tyakeko.

⁹Exowakiya maisa waiyekehalakere enomanaha Iraeti Waiyexe nanekoa xairatyoare tyaonitere, Jesus ite kasehetehenere nitere.

¹⁰Hatyaoseta hatyo hinamanai haikoahetaha hahanaha xeta.

¹¹Hoka Maria Madalena atyo hekota tyaonita xawatyakalati haliya, tiyita. Haosexa naseta meholokoa tanatyoa waiyakotya xawatyakalati.

¹²Waiyehena atyo, owene hinama anjo tyaonita iyomere nimere makere. Tyokahita Jesus xomokakaose nali, hatya eseri maniya, hatya ikiji maniya xoaha.

¹³— Xoana hoka hitiyita? nexaha axaha Maria. — Iyehenahitaha noxekohase háre hoka aliyo xamani xane mokahene — nexa Maria ihiyeha.

¹⁴Nexa hoka ehaikoahaloheta, waiyehena atyo, Jesus atyo owene tityoita hoka motya maisa hatyota xini aokitene.

¹⁵Hatyaoseta Jesus axene: — Xoana hoka hitiyita? Xala xahita hatawita? nexa. Motya hatyo naliye hanakati kaxaikotyasehare aokene Maria hoka nexa ihiye: — Xoana, hiso hiyeheta noxekohase háre? Aliyo hamokene? Alitere atyo hakolatene hoka hiyakai nohiye hoka noxani nakolahetene hahalakihenerene nalita hoka hakiti noxani nafehetehitiyene — nexa Maria ihiye.

¹⁶Hatyaoseta: — Maria! nexa Jesus. Nexa hoka ehaikoa enomana hoka nexa: — Raboni — nexa ihiye, hebreunai xako irai. Wiyako maniya atyo, “Xaotyakisatiye”, nita.

¹⁷— Awa atyo hotohena natyo noxanini nahitita Baba nali. Hiyane kaisere nohinaeharenai hiye hiyakaihetehena natyo. Maika hexa ihiyeha: “Eno tyaite xanehena Hanexe Enore nali, exahe Xexe Enore nali”, hexa ihiyeha — nexa Jesus Maria Madalena hiye.

¹⁸Nexa ihiye hoka Maria Madalena xane xakaiheta Jesus xaotyakiraharenai hiye: — Nowaiyehetaore Xekohaseti — nexa Maria Madalena ihiyeha, Jesus niraene harenai xakai ihiyeha.

¹⁹Hatyo domingone makehena hoka exaotyakiraharenai hohisakoaha hati waiye jihotyakere ako, judeunai nityohalitiranaiha amairakisahitene hoka. Hohisakoaha hoka Jesus kaotyaka enomanaha hoka tityoa enenekeseneha. — Maika waiye ximehexaikohare xisaona naoka — nexa ihiyeha,

²⁰hotikisa hakahekoa berekotyakaose, hakoihakore tonotyakaose hare hotikisa enomanaha. Waiyehenahita haxekohaseha hoka ihalaharehenahita.

²¹— Maika waiye ximehexaikohare xisaona naoka. Baba Enore axikahenere natyo akereta atyoite naxikatya xiso — nexa ihiyeha.

²²Nexa ihiyeha hoka aomomaharehenahitene. — Isekohaliti Waiyexe tyaona xikakoa naoka — nexa ihiyeha.

²³— Haiyanai nómanenai iniyalahare xemaisatita hoka kamaotyanetyakaiya. Hoka maisaiya xemaisatita hoka maisaiya kamaotyanetyakita — nexa Jesus ihiyeha.

²⁴Jesus kaotyakehetehenere enomanaha xowaka atyo maisa nali enekoniha aka háhare exaotyakirahare Tomé, Dídimo aokahitere.

²⁵Tomé kaokeheta enomanaha hoka exaotyakiraharene haiyanai nehenaha ihiye: — Wiyaiyeheta Xekohaseti — nexaha. — Kala xamaoseraita. Maisaiya atyo nowaiyita eberekotyakaose ekahekoa, exahe namokita nokahihi eberekotyakaose, exahe namokita nokahe etonotyakaose ekoihako akiti hoka maisaiya atyo notyakekota xiraini — nexa Tomé.

²⁶Tyaohenaha, hasemanane najikinita kala Jesus xaotyakiraharenai hohisakoahenahitiyaha, Tomé kakoareha atyo. Hati waiye jihotyakahare ako tyaonahitaha. Hatyaoseta Jesus kaotyakihitiya enomanaha. Tityoa enenekeseneha hoka nexa ihiyeha: — Maika waiye ximehexaikohare xisaona naoka — nexa ihiyeha.

²⁷Hatyaoseta Tomé hiye nexa: — Wityaira hiyaiya hoka hikahihi hamohena nokahikoi, exahe hikahe hoka nokoihako. Awaira hamatyakekohena. Maika hityakeko — nexa Jesus ihiye.

²⁸Hoka nexa ihiye Tomé: — Noxekohase, Nenorixi! nexa taita iniraine nahalakoa.

²⁹— Hityakekoheta atyo, hiyaiyeheta tyare natyo hoka. Hoka waiye kaiserehare atyo mawaiyanehareta tyakekotere natyo — nexa Jesus.

³⁰Jesus atyo kahare xoalini hare tyoma haxaotyakiraharenai haoti tyakekoha maheta, hoka maisa atyo tyotya etahi kaxairatyakita exe baberanekoa.