Yon 20:2-30

²Kale nadunade wabading ulum kim dim biyaku tad Saimon Bita so weng kidimin kinim mak Yesus alam aket kudawsa kinim aso bakoyam, “kiba Kamokim ade tum tem daw kan kei dew unsidiw be num kal banim, yakal dawtisidiwe?” Yakune,

³Bita so weng kidimin kinim mak so alew isik fom gu dim uniw.

⁴Kale alew biyaku unom nadiwe weng kidimin kinim mak asik Bita akadaw yak tum tem nadane

⁵kadák fenomo, ilim kal kimis kuw budu utamsa, kata tam tum tem unongin danim.

⁶Kale beta Saimon Bita dawo yanol dabadá tada ayo tad abe nadane tam tum tem kalomo ilim kimis be utamomo, ilim mak

⁷alam gebom falal dausiw ilim kal so be kalomo, ukul fakel kidel takas yak bán kukum teinbu ka.

⁸Kale beta weng kidimin kinim mak alasik tad tum tem tada ayo alaso wakas tam kidin tem utam nadane aket afan kalesa.

⁹Got godin weng uyo bako nadu, Yesus be fikale, talá tabokabano, kalesu uyo ika kidela finang dá, kal keidongin dakosiw.

¹⁰Kale weng kidimin kinim iyo kudá asiki ilim am uniw.

¹¹Kata Madiya utane, tum tem mewso abiw tod bom amansu. Kale uka aman bom nadune tum tem kadák fenomo,

¹²ensel alew mak ika lim namal mikibiwo, kalomo ika Yesus atukul kutisidiw kal bidiw ka. Yakune,

¹³ika dákadá bakomam, “wanang, kuba wataw kalan amanbáwe?” Wakiwe, uka bakoyam, “nam Kamokim dew unbiw ade im dawtibiw, be nam kal banim,”

¹⁴kalanom naduno, fal maek dusikidomu, Yesus ayo tod be ka. Akeisu, kata uka Yesus báno, akeisu.

¹⁵Kale aka bakomam, “wanang kuba, wataw kalan amanbáwe? Kuba, kan atamono, fenbáwe?” Wakane, um aket bo, aka bináliw kin moyámin kinim, memak kala. Kale naduno bakodaw, “kinim kaba, kawta dew unbaw namti, kal dawtibino nakawo yak dew tadono.” Aku nade

¹⁶Yesus asik bakomam, “Madiya.” Wakane, uka dumade atam nadune aket dakat, kale aman batbat bom, Adameik weng bakodaw, “Adabonai.” Akeisu, umi weng mit uyo, “Kukumin kinim kaba.” Akeisu.

¹⁷Kata Yesus weng bakomam, “namadew fakanin bá, watawo kaleyo bá, naka Natim atamin dakobi, kanamin dako namadá nadawo yak nam nikil itam bakoyam, ‘naka Natim finang unono, kanabi ade kim Kalaw so nam Got so kim Got so finang unokabi kala.’” Waka nade

¹⁸Makdala abiw kayak wanang Madiya uyo weng bakomama, be dew tad weng kidimin kinim bakoyam, “naka Kamokim atami, weng bela bakonama, dew tadi.” Kalesu.

¹⁹Kale kamakikiw am dánámin wik kuinan tad bada weng kidimin kinim ika tada tada au dutam am dá, Yu kayak itam fingán dá, am fal kawkaw ned dabadá teiniwe, Yesus tad im iwyak tem tod bakoyam, “aket dakbudin uyo kiwso badano.” Yakei nadane

²⁰aka alam teng so madan so kukuyam badane, weng kidimin kinim iyo Kamokim atam nadiwe aket kalfalin seng kudusiw.

²¹Kale Yesus ayol alo bakoyam, “aket dakbuyámin uyo kiwso buduno, Natim namadála tasi, ulutaw kiba imadáli unokabiw.”

²²Kalbane, aka mam fu dok moyam nadane bakoyam, “Abem Sinik ayo dabulin kala.

²³Kiba kan kinim am ban keimin lukuwá kudálawokabiw, beta Got akal am ban keimin uyo lukuwá kudálawokaba. Kata kiba am ban keimin lukuwá kudálawongin banim namti, Got akal am ban keimin uyo lukuw kadálawoma banim.” Yakeisa ko.

²⁴Yesus ayo kinim kilung kal walusa itamono tase, kata walu dausa kinim mak Tomas awang man aka aso teinongin danim.

²⁵Kale weng kidimin kinim ika weng dew yak bakodaw, “nuka Kamokim atabuw.” Kaliwe, Tomas ayo bako, “naka nalata kuw teng nil amluk atam nadinade nam sikal dew yak am nil gu malelaw nadinade nam sikal am madan un binosidiw gu uyo malelaw, au nadino kuw, naka afano kalokabi.” Yakeisa.

²⁶Kale wik mak banimane, yanol weng kidimin kinim ika alo am dutam dádiw, Tomas alaso am tam una, awsom fal kawkaw ned dabadáliwe, yal lei adikum bákidiw, kata Yesus aka tad im iwyak tem tod nadale alo bako, “aket dakbudin uyo kiwso badano.”

²⁷Yakei nadale Tomas bakodaw, “kam sikal uyo kudew tad nam teng nil gu kuti utam nadawe madan un gu malemam keidalo. Kaba atam nadaw aket báyo kalin bá, kata aket kunamalo.” Akane,

²⁸Tomas bakodaw, “ayi kaba, nalam Kamokim ade nalam Got bo!” Akane,

²⁹Yesus ayo bakodaw, “kaba natamaw kayo aket kunamaw. Kata kan ata natamongin danim, aket kunama namti, aka daw kinim dádi am aket kalfalin uyo atin seng keidokaba.”

³⁰Kale Yesus aka am weng kidimin kinim im kin dim kal kukuw makik makik seng seng uyo kanamsa, kata bu buk tem kaek godulongin danim.