Jenesese 11

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

37

38

39

40

41

42

43

44

45

46

47

48

49

50

¹Yuu muu dupwana peparae wambu dupwame pii raramendaki lao kareyaminyisa pii wakale wakale ingyuo paa naya.

²Dokopa wambu dupwa neta epelyamo dorena palimwa karama peyami dokopa yuu Sina dokona yuulama keyange mende siyamo kando nyepala dokona papala paleyami.

³Karapala dokopa pii mende dopa pyuo leyami. Yuu lapo nyepala kana semene inginya lao isare dokona poraiyuo kiso wasamanale, leyami. Dopa pyuo lapala kana nyuo bange lapo wakaiya yale kana rambu larama lao nyuo reteyamiko.

⁴Retapala dokopa nakamame lao, Namwa yuu muu dupwana wakale wakale bolombalo lao pasasaramaŋa dokona daaŋa lao namwana kingi ketae pena lao epapu namwame yuu taone andake pyuo dee anda londe mende yake doko kando nyinya lao pyuo pimana, leyami.

⁵Dokopa Kamongo doko isa epapala akali dupwame yuu taonepe anda londepe piyami dupwa apa pilyamipi lao kandalana epeya.

⁶Epokandapala Kamongome dopa pyuo leya. Kanda, nakama pii mendaki lao rara mendakyako ingyuo karapala yulu andake kanda soo pilyaminyi. Enakana mende pinya lao suupyarami ramo doko yakara pirami ingya nalyamo.

⁷Dokona lao nakamame yango mendeme mendena pii doko see nanaleŋe lao nakamana pii dupwa wakale wakale lenale ukiaki minyala isa lupyuo monale, leya.

⁸Anatumi dopapyuo bolombalo lao pena leyamosa nakama yuu taone piyaminyi doko yaki nyuo kaepala yuu muu dupwana ralo peyami.

⁹Kamongome nakamana pii ukiaki minyapala yuu pandape dokona piso wambu yuu muu dupwana bolombalo lao pena leyamo dokona yuu doko kingi Bapele lenge.

¹⁰Dapwa akali Semena manjo para pyao peya. Ipwa sokwapeyamopa enakana ee kana lama epo papeyamo dokopa Seme ee kana 100 nembo karo wane Apakesate mandeya.

¹¹Apakesate manjo nyiyamopa enakana ee kana 500 dusipana karo dokopa wane wanakepe lapo opetae konda pyuo mandeya.

¹²Apakesate baa ee kana 35 nembo karapala enakana wane Sela mandeya.

¹³Manjipala enakana Apakesate ee kana 403 dusipana karo dokopa wane wanakepe lapo opetae konda pyuoko manjo kareya.

¹⁴Sela baa ee kana 30 nembo karapala enakana Epa mandeya.

¹⁵Epa manjipala ee kana 403 dusipana karo wane wanakepe opetae konda pyuo mandeya.

¹⁶Epa baa ee kana 34 nembo karapala dokopa Peleke mandeya.

¹⁷Manjipala ee kana 430 dusipana karo dokopa wane wanakepe opetae konda pyuo mandeya.

¹⁸Peleke baa ee kana 30 nembo karapala baa wane Uru mandeya.

¹⁹Manjipala ee kana 209 dusipana karo dokopa wane wanakepe lapo konda pyuo mandeya.

²⁰Uru baa ee kana 32 nembo karapala baa Seruku mandeya.

²¹Manjipala ee kana 207 dusipana karo dokopa wane wanakepe lapo konda pyuo mandeya.

²²Seruku baa ee kana 30 nembo karapala Neo mandeya.

²³Manjipala ee kana 200 dusipana karo dokopa wane wanakepe lapo opetaeko mandeya.

²⁴Neo baa ee kana 29 nembo karapala Tera mandeya.

²⁵Manjipala ee kana 119 dusipana karo wane wanakepe opetae konda pyuo mandeya.

²⁶Tera baa ee kana 70 nembo karapala Aporame Neo Arane dusipa mandeya.

²⁷Tera banya wane mandeyamo dupwana kingi mende Aporame Neo Arane dusipana rakange doko kareya. Arane baame Lote mandeya.

²⁸Arane baa banya rakange Tera kumapa nayamopa yuu banya range kingi Ua lenge Kalitia wambu karenge dokona wambo kumuya.

²⁹Aporame Neopa enda nyiyambi. Aporame banya etenge doko kingi Sarai lenge. Neo baa enda kingi Milika lenge nyiya. Enda dokona rakangena kingi Arane lenge dokomeko wane Milika Isikapa mandeya.

³⁰Enda Sarai baa wane manja nao mee ingi poraiyuo pote ingyuo peteya.

³¹Akali Tera baame ikinyingi Aporamemoo banya ikinyingi Aranena wane Lotemoo Aporamena etenge Saraimoo nakamana yuu kingi Ua lenge Kalitia wambu palenge doko yaki nyepala yuu Kenane panya peyami. Papala yuu mende kingi Arane lenge dokona pao kando nyepala paleyami.

³²Tera baa ee kana 205 nembo yuu Arane dokona karapala kumuya.