Jakobo 1

1

2

3

4

5

¹Jakobo no Anutu â Jesu Kristo ere kiŋaŋ qaqazi Israe ŋicguru 12 siŋsaŋ qarâ juraŋgopieŋ ŋoŋe mu ʒeri eŋarehuc papia ʒi râe‐ŋarekopac.

²Ŋoŋerao eesâic fuŋne fuŋne fuame manapie bubiaŋnehec sasawa ezejec.

³Wiac iŋucnezi hâcne mamanasiŋ‐ŋeŋic ba esâic ecnekume gâtâ bame ŋoŋerao sasanaŋ fuaocmu.

⁴Sasanaŋte fârine ŋoŋerao fua‐hâmozejec, eme wiac moc mi basahuc bahacmâc â maŋfuru junʒepieŋ.

⁵Ŋoŋeraonec moczi maŋɋârâŋ basarâ Anutu numucnezejec. Eme e ŋic sasawa, dâŋ mi munârehuc, wiac maŋhumuc nâreekaczi bâfuacneocmu.

⁶Nunumu ine maŋjahec ehuc mâcne, Wofuŋ manasiŋkehuc numucnezejec. Maŋjahec eocmu e hâwec siri, mâŋâŋzi ficne sueme fâuckerâ tâtieekac, iŋucne eocmu.

⁷Ŋic iŋucnezi Wofuŋtaonec wiac moc roocmu mi muzejec.

⁸Maŋguru â tie faranezi wemocko iŋuc eocmu.

⁹Opâ ruac wahakicnezi fekicne jukopac muhuc maname ʒerine ezejec.

¹⁰Â mafaŋiczi wahakicne jukopac muhuc maname ʒerine ezejec. Jâcârizi ŋeindaŋnerâ biac mârâŋkeekac, iŋuc jaha mafaheczi biac siroweniŋmu.

¹¹Ʒoaŋ e furicte wefurâ ʒocnezi ʒariŋ rikeme ɋaŋame ârine mârâŋkeme eri‐ticne wahaekac, iŋuc jaha mafaŋic jaŋe ɋaŋapie qâŋtac‐jeŋic sawa ŋeocmu.

¹²Ŋic moc e eesâicko qiŋ herâ juocmu ere manape ʒerine ekac. E sanaŋkeku maŋne eme Wofuŋzi eri hendiŋ juju sanaŋ hâcne râcneocmu. I maŋjeŋic ere domakac jaŋe biŋe qajarekicne.

¹³Ŋic moc sâqocnere eesâic fuacneme ʒiŋuc mi muzejec: Anutuzi esâicnukac. Sâqocnere eesâic Anuturao fufuane mi fokac, â eki wâc ŋic moc sâqocnere mi esâickeocmu.

¹⁴Eesâic ine kecʒiŋuc fuaocmu, qanaŋ ŋic moc e jahacne saseczi beŋgisic sicnecnehuc hehawickeocmu.

¹⁵Eme saseczi motec kiweckerâ roocmu, ʒâŋene sâqocne; sâqocnezi ine woze qeuc eku hâmoc bâfuaocmu.

¹⁶Âgo biaŋfâc‐nane, ŋoŋe dâŋ mi mana sifuckenʒepieŋ,

¹⁷jauŋ biaŋne â taha fârine i faicnec sasawa, tatamac Mamac eraonec wahaekac, erao hâcne hec hetikic â sâsâoc mi fokac.

¹⁸Anutu e manapaŋkewecte dâŋfârizi naru motecfâcne bâfuac‐nâpowec, i wiac sasawa bâfuawec irec hata qaqasune tinac enaŋte iŋuc enârewec.

¹⁹Âgo biaŋfâc‐nane, mananiŋ. Ŋiczi dâŋ mamanare afeckenʒepeneŋ, dâŋ mumure â aaricte ine ŋemâckenʒepeneŋ.

²⁰Aaricko wiac eeŋgopeneŋ izi Anuture tiŋne hata ririekac.

²¹Irec ŋoŋe maŋwânâŋ â râŋgeŋ bârâŋgeŋ hetararâ urucko juhuc maŋŋeŋicko mitidâŋ râekicne i âgo ecnenʒepieŋ. Izi hâcne maŋ qâqâtâc‐nâŋec bâpiaŋkeocte tâpiri focnekac.

²²Ŋoŋe mitidâŋte fârine bâfuanʒepieŋ, mâc hazecte nâpene sawa eme maŋŋeŋic eatuckeniŋmu.

²³Moc e mitidâŋ mana qâoma eocmu, e ŋiczi ʒâŋe mai‐nâŋec hawario honerâ eeŋgopeneŋ, sâc ijaha eocmu.

²⁴Ʒâŋe mai‐nâŋec hawario honerâ ra qâoma erâ izia hawari‐nâŋecte nikec‐nâpoekac.

²⁵Â moc e sâcmutâc dâŋ fârine, rambaŋko rârâec‐nâpone, dâŋ ira mana utuckerâ juocmu, ehuc mana qâoma mâcne, mana rereŋ eocmu, iŋucnezi ine dâŋte fârine bâfuarâ mana aŋac eocmu.

²⁶Moc e mitio jukopac muekaczi micbipic‐ticne mi soŋaŋkehuc maŋticne eatuckeekac, ŋic iŋucnere mitio juju i racne eocmu.

²⁷Hozec bekâ busâqocko juhapie hone maiŋ ejarezo â mâreŋko sâqocne fokac izi maŋnâŋec hegâpârezacte pectâc juzo, izi Anutu â Mamac ere maio wâwânâŋ tâmiricko mitio juju ekac.