Iwata Ari 2:1-22

¹Edo Yesu da betari wasiride erari pura berari 7 ainda amboda, Judah embomainda bondo deguta dao Pentekos awa gupusina. Iji dá ainde Yesu gebé ari embomai berari kotembari da (1)mi yai dá ainda doregesitera.

²Edo burigibé yavi utuda edo gupeiri gositera, dá bisibubura tumbari goroba ango. Edo yavimi yai berari mando doda awamane anumbesitera ainda arapu esisina.

³Ainda edo awamanemi rorae gositera. Niyao beriberida kariwa iwawa ango idegesisina. Edo rorae ami evekara eite maundo embo da da tujijisina.

⁴Ango edo God mi Asisi Kotopu awamane berarida yai piesiri ami awamane gisijijisina. Edo Asisi Kotopu mi ari tao ari awamaneda yai pipisiuri awamanemi tuturo edo ge teka yai neneinda ami tedo douri tedo esitera.

⁵Iji dá ainde, Judah embomai, awamane awa God tou ari embomai, ami yai evekara butu berarida edo gundo Jerusalem doda isiretera.

⁶Iji angode yavi eiwa ingido gundo dada doregesitera. Edo aindabé embo da da awamaneda ge topobé ami tero ingido, awamane anana esitera.

⁷Edo awamane berarimi bé korebakore edo gido daredo ge mina tara esitera, “Giu! Embomai owa Galili embomai berari, ata ge embo neneinda ami tera!

⁸Nongo nongo edo owamane ge tero kaena da da mi ingena berari awa ge bé kaenato topobé kaena engitera ge ami?

⁹Kaena nenei awa Patia embo, Medea embo, Elam embo, Mesopotamia embo, Judea embo, Kapadosia embo, Pontusi embo, Asia embo, Perijia embo, Pampilia embo, Kerisi embo, Arabia embo, edo Egypt embo. Kaena nenei awa yai Libia edo gumbera (Yai Libia ainda nasi Sairin demo ounda isima edo era). Edo kaena neneimi Rome nasi dodo gundo Jerusalem etega era. Kaenato Rome embo kupo da (1) awa Judah embo, edo kupo nei awa Judah embo ae. (Ata awamaneda gebé ari matu dodo Judah emboda God ambo ambo edo era). Awarata, kaena berarimi God da wasiri babainbé awa owamanemi ge kaenatomi karigetero ingera!”

¹²Ango edo awamane berari bé korebakore eite edo ananabé eite akuta tedogari mina tara edo esitera, “Ro awa embo wasiri eiwa idegeteiri?”

¹³Ata embo nenei Yesu gebé ari embomai awa tedojijireite sitera, “Owamane waini jiwaebé indera!”

¹⁴Edo iji angode Peter erido peposisina ae embobo 11 de daedo. Edo ainda ge yavi jiri erido bajinabé esiri embomi gotero tuturo edo ge sisina, “Judah embomainde imomane berari Jerusalem doda itewa awa daedo, dengoro edo, ge tain ena. Eiwa dave edo ingiwo!

¹⁵Iji einde sipo teka 9:00 eira. Awatedo, embomai eiwawa waini jiwaebé injido dutera, ango awa inemanemi kotemainyae.

¹⁶Ango ae, arata, wasiri nakare boroko era, eiwa amboda gumaina awa, God mi peroveta Joel de embomainda yai tarate sisina awa karigesisina:

¹⁷‘Edo deguta beao eiari na buro ro ani awa eire. Na God ami nato Asisi awa embo berarida yai dodegana. Ango ano itomane mamai ae maingagara de nato bino karigara. Edo itomane maisinga banga garago girago​ ​awamaneda yai pirigano gara. Edo itomane embo begogo bagogo ano aturo ara.

¹⁸Edo daedo nato buro ari embo de eutu de deguta dá angode Asisi nato awamaneda yai dodegano nato ge karigara.

¹⁹Nane wasiri babainbé utu ikaneda ano idegari gara. Edo kariwa nenei butu tuda piano gara. Awa ororo ae niyao de gara. Edo imbosimi dongowo dongowo ari gara.

²⁰Edo iji awa wareregedo muyae ango ari, kariga wareregedo ororo ango aina, BADARI da deguta bajinabé bajina de kore ari taogari de gumbae gisida.

²¹Edo iji angode, embo aimi BADARI da daoda gebé eite benunu taina awa, God mi embo awa tonemaina.’

²²“Israel embomai, ge eiwa ingiwo! Iji ainde Yesu Nasaret Embo itomane doda isite, God mi goroba ainda yai piesiri buro babain, wasiri babain, edo kariwa nenei edo eutara. Ango edo God mi itomane yai arapa euri gido eutara awa ami embo awa piesiri gupusina. Edo inemane akuta gewa awa gebé.