Apostolo 2:1-22

¹Ing no bung na Pentikos ga hanuat ira ut na tinaram tano lotu kaia diet ga kis tika taar tiga katon.

²Kaik at mon tiga kinakel hoing tiga dadas na punpuh na baiangin ga wawaang suur meram ra mawe ma gaam burung no tingena hala bakut ing diet ga kis taar kaia.

³Io, diet ga nas ra linge hoing ira kalkalamena iaah, ma kaike ra linge ga haan harbasia taar ta diet gaam kis ta diet ira tunotuno tikatikai.

⁴Diet bakut diet ga hung ma no Halhaliana Tanuo ma diet ga haburen nianga ma ra mes na nianga hoing at no Tanuo ga tar ra dadas ta diet bia diet na ianga me.

⁵Ta iakano pakana bung a haleng na Iudeia ing diet git lalotu tupas God diet gate hanuat mekarawa ta ira subaan bakut tano ula hanuo ma diet gaam kiskis kaia Ierusalem.

⁶Ing ira matanaiabar diet ga hadade iakan ra kinakel diet ga hanuat hurlungen. Ma diet ga nguanguo kanong tikatikai ta diet ga hadade no uno nianga tus ing iakano kabaan diet ga iangianga me.

⁷Ma diet ga karup, diet gaam ngalabo kaik diet gaam tange bia, “Kaiken ra tunotuno diet iangianga, diet bakut mon me Galili, naka?

⁸I ngan hohe tun at bia dahat tikatikai dahat hanhadade diet ma diet iangianga ma ira udahat nianga tus at?

⁹Dahat me Partia, Midia, ma Ilam; ma dahat me Mesopotemia, Iudeia, ma Kapadosia, Pontas, Esia, Pirigia, Pampilia, Isip ma ira kaba katon Libia hutet Sairin; ma a wasire mah meras Rom, ira Iudeia ma diet ing diet gate laka tano lotu gar na Iudeia; ma ari ta dahat me Krit ma Arebia. Ma dahat hadade kilam ira udahat nianga tus ing dahat hadade diet ma diet iangianga uta ira dadas na pinapalim ta God!”

¹²A kinarup ma ra nguanguo ga kis ta diet kaik diet gaam hartiritiri haan bia, “Asa no kukuraina iakan ra linge?”

¹³Iesen ari balik ta ira matanaiabar diet ga hasakit ta diet ma diet ga tange bia, “Diet te mame ra haleng na dadas na taah kaike.”

¹⁴Io kaik, Pita ga taman tut tika ma ira sangahul ma tikai na apostolo gaam ianga tamat wara haianga ira matanaiabar hoken: “Kaba hinturagu na Iudeia ma muat mah ing muat la kiskis kai Ierusalem, iau ni palas tar iakan ra linge ta muat ma muat na hadade timaan ira nugu nianga.

¹⁵Ken ra tunotuno diet pai mom hoing muat lik. Taie. A liman ma ihat na pakana bung mon baak ra malaan kaiken!

¹⁶Iesen iakan nong no tangesot Ioel ga hinawas utana ing God ga tange bia,

¹⁷‘Tano hauhawatine ta ira pakana bung iau ni gil hoken. Iau ni burange bus ira kaba matanaiabar bakut ma no Tanuagu. Ma ira numuat bulu na tunaan ma ira nat na hahi muat diet na ianga na tangesot, ira numuat kaba marawaan diet na nas ra ninaas na tanuo, ma ira numuat kaba patuana diet na bariane ra barbarien.

¹⁸Ma iau ni burange bus mah ira nugu tultulai, hahin, ma tunaan, ma no Tanuagu ta iakano pakana bung, ma diet na ianga na tangesot.

¹⁹Iau ni hamines ra linge na ngalabo aram ra ula mawe, ma ra kaba hakilang kai napu ra ula hanuo hoken: na mon de, a iaah, ma ra tamat na mis mah.

²⁰No kasakes na kankado ma no teka na daraan hoira de nalua bia no tamat na bung sakit gar tano Watong na hanuat ma ra but na minarine.

²¹Ma diet bakut ing diet na tau iau no Watong bia ni halon diet, iau ni gil haruatne.’

²²“Muat ra kaba matanaiabar na Israel, muat hadade timaan ken ra nianga. Iakan ra Jisas meram Nasaret, God ga hatutun tar ie ta muat bia aie sige. Ma ga hatutun huo ta ira gingilaan na kinarup ma ira dadas na hakilang ing ga gil narakoman tano nilon tane Jisas nalamin ta muat. Ma muat palai taar ta kaiken.