Israel Hanigo Namba 22:4-18

⁴Tialima, te Moap dabego te Midian dabe tobolu bidibolo e tama po wali, “Pęwadage sogo mu tama te hanigo dago bulude elalubo nai dabe sese mu silaibao, te kau kibugo nosai tubo tiwai yaibao,” te po wai.

⁵Tama tialima, tuni bidi Balakgo te bidi Balambolo waligi pomainu bidi dabe tagala palali, te Beorgo ogwa, te aga te tuni bidi Balak suagasomainogo yai. Balam te hanu Petor te ąį Yufretis pąde bidali, te aga page bulu pąde. Balakgo te bidi dabebolo te Balambolo e tama po wao po wali, “Ena Balak dao. Eno homugo nago konemainogo ebao, te we bidi hani me te Isip buludu aselama, te tigidali buluba mu usu nigi palio. Tama megi da, augwali dago bulu pąde bidibao, tiyu augwaligo dago bulu sidalio.

⁶Augwali hauwa mu dao, tama dago augwali aiyaba elaluabo usu menio. Tama tialima, eno homugo nago te god dabe nogi olama, tama te god dabego augwali dolomainao. Tiali tama nago tama tiyu da, teda dago homugo dago augwali dali bomona hwįnama, tama augwali dago tǫde sela sąwaibao. Eno koneani, nago te god dabebolo te we bidi bugagia bida wali te godigo tama tibo dao. Tama ma, nago te we bidi dolao wali da, teda te god dabego augwali tama dolobo dao,” Balakgo te po Balamba ola tolali.

⁷Tialima, te Moap de Midian tobolu bidi dabego te po te Balam pageba sela pali. Augwaligo te Israel dabe dolao omainogo abelabo mone dabe meba me sela pali. Tama augwali Balam pageba sabolama, tama Balakgo po agabolo pusali.

⁸Tama Balamgo e tama po wali, “Dage megi hulide eno bede piao, tama dagebolo eno Genuai Bidigo wabo po dabe dagebolo do pusaibao,” te po wali. Tialima, te tobolu bidi dabego Balamgo po odama, aga dali bidali.

⁹Tama hulide God aselama, Balambolo te po hanalu wagasali, “Te mena bidi dabe nage dali bidibowe? Augwali magi sę yainogo asaliwe?” wali.

¹⁰Tama Balamgo Godibolo te po walali, “Balak te Moap tuni bidigo augwali eba taga palali, tama augwali enabolo te po pusainogo asali,

¹¹te we bidi hani me deli Isip bulu tagalama, tama Moap bulu tigidali usu nani wabo po pusainu asai dao. Tama agai homugo eno te god dabebolo olama, te god dabego augwali dolama, tama agai te bage dali bomo elama hwįnama, augwali sela sąwaio wali,” Balamgo te po wai.

¹²Tiali goli, Godigo Balambolo te po wali, “Nage te bidi dabe dali me pelamu dao, tama nago te Israel dabe dolao po me wagi pelamu dao. Magi baso meni, ena augwali dali bidama, augwali eno bugagia tonaluai dao,” wali.

¹³Tialima, kigamu te Balam te Balakgo tuni bidi dabe pageba pelama, te po wali, “Dage naga duga buluba ma piąo. Ena me pogobeo. Genuai Bidigo ena dage dali pigio homu yalio.”

¹⁴Tialima, te bidi dabe augwali Balak pageba pelama, te po wagi pali, “Balam da dali asobo hagela yalio,” te po wai.

¹⁵Tialima, nosali Balakgo te tobolu bidi dabe te hasia pali bidi dabe tobolu bidi nogi edelai bidi dabe hauwa mu i olama asali.

¹⁶Tama agai augwalibolo agai po Balambolo pusigi pomainu yali. Balakgo po e dao, “Balam, nage ena pageba tama asao. Eno homugo nage magi nai mego nage dąų omainu igio homu ebao.

¹⁷Nage aselama, tama nage eno nai dabe hauwa mu menama, tama nago homugo enabolo ya wabo nai dabe sese tama eno yaibao. Tama tiali, eno homugo nage aselama, tama te we bidi dolabo bomai po nago wagasao,” Balakgo te po ola tolali.

¹⁸Tama augwali pelama, sabolama, te po Balamba pusali. Tiali goli, Balamgo te Balakgo sę bidi dabebolo te po wali, “Te Balakgo ena agai be te silva de gol sigo pągąnama, tigidali mobadi me tagalao. Eno Godigo po me sela sągobeo. Te eno Genuai Bidigo magi nai me dabede me sela sągobeo.