Israel Hanigo Namba 15:29-36

²⁹Te dagego homugo bugagia konesąma dwai sę yaibaso da, te dagego te bomai po deli naga wali piąo. Te Israel dabe, ma te gasa bulu bidi duga bulude bidibo me, tagala.

³⁰Tiali goli, bidigo me, ma wego me ena dali tobolu gagea pelama, dwai sę ebaso da, teda agai ena Genuai Bidi posobo po tiwai te wabao. Tama tialima, dagego aga elama isilao. Te aga te dage Israel dabe, ma gasa bulu bidi yaibaso me, tagalao, te dagego bulude bidibo me tagalao.

³¹Magi baso meni, te we ma bidi aga digi aga tobolu gagea peyu, aga homugo eno bomai po te sela sąbao. Tama tibaso, dagego aga ela muao, te aga dagede dao,” te po wali.

³²Te Israel dabe augwali te nai meni yai kemi sane bulude bidibadi, te bidi me deligo Sabat sogo isi sabo suali.

³³Tama augwaligo te bidi Moses de Aron si ebadi, me te Israel we bidi tigidaliba odasa pali.

³⁴Tama augwaligo aga kalabus iliyu bolo yali. Magi baso meni, augwaligo konebe, augwaligo aga magi sę egowe te augwaligo konesąbaso.

³⁵Tama Genuai Bidigo Mosesbolo e tama po wali, “Dagego te bidi elama isilao,” po wali. “Aga te dage bidibo pesage tagalama, buluba ogwaba odasa pelama, tama masigi dabe aga tigiba sąnama, aga elao, tama isibaso tagalao,” wali.

³⁶Tama te we bidi dabe augwaligo Genuai Bidigo po wali peyu, augwaligo te bidi bidalubo pesage taga peyu, odasa pelama, bulu badu augwali aga masigigo enama, isali.