Isaiah 10:1-7

¹Nina law kaola ko kari alo, me ta namaralkowo! Mu awuk, nina law memek, kariimet te nunga maguwura ko, mu kalo nungursan,

²ale ninga law memek umu te aninga kariimet nungumik mel mena alo mu nunga bita maguwusan; ale nunga ikup diram la me ari nungursan; ale imet gerewa se kuriang nungumik nunam nonet mena mu, ninga kawel te nunga melmasak nongote gisan.

³Ninga munan memek sumu ko koma sor awar te tairuk, mu nina awuk beteralko? Nina awiri kote saonga ko nagu namaralko? Ale kawel te mel ningo gi lagaman sumu aparete awuralko?

⁴Mena! Lage bo mena. Mu talipara ningi namaral, agi ninga momon se kueralkowo. Munan uwuta aratuk ta wore, noko gomang motam me ta kua kaposo, kuting daong ko am kualala aniso.

⁵“Ani Yawe iwita balsam, aninga angamang memek ko bu mu Assyria kuting te beterem, se kuting te aniso.

⁶Se ani bitirik se sor ani me aga ikia iwita bitawoso se ani ko angamang ninguru magawoso, mu kote namaruk ale moruk ale moa lom gege ningi saparuk, ale suwik te irawa se ko melmasak ningo ningo gi karogo nama saparukko.

⁷Bare munan Assyria bitawoso imi, nu kota ko ikia te me bitawoso. Noko ikia biya mu, sor suen biya nunga moa mituwurok ale menawurokko wore te sanamoso.