ISAIÆ 10:17-21

¹⁷Et erit lumen Israël in igne, et Sanctus ejus in flamma; et succendetur, et devorabitur spina ejus et vepres in die una.

¹⁸Et gloria saltus ejus, et carmeli ejus, ab anima usque ad carnem consumetur; et erit terrore profugus.

¹⁹Et reliquiæ ligni saltus ejus præ paucitate numerabuntur, et puer scribet eos.

²⁰Et erit in die illa: non adjiciet residuum Israël, et hi qui fugerint de domo Jacob, inniti super eo qui percutit eos; sed innitetur super Dominum, Sanctum Israël, in veritate.

²¹Reliquiæ convertentur; reliquiæ, inquam, Jacob ad Deum fortem.