Iputu 6

1

2

3

4

5

6

7

8

9

10

11

12

13

¹Dopana, naimame deaka tee pyao Kataisanya lao mana nyala nayamana. Naimame deaka anda muku minala nayamana. Naimame mona kapilyoo mana koo tenge dupa maita maimana lawapi, Gote masoo minamana lawapi, kaimala pipae walya pyao nepenge dupanya mana lawapi, endakalinya aiyomba minani pipengena lawapi, endakali kumapae dupa pitaka sakatatamina lawapi, Goteme endakali yapatamopa kaitinya etete katatamina lawapi, yuu koonya etete katatamina lawapi dupanya naimame deaka pilyoo mana laa nayamana. Daa, indupa naima andao pao endakali angi jetae katamana.

³Goteme doko kapana lao masetamo kandao doko, kiningi naimame dopaka pimana.

⁴Endakali mendapuame Gotenya tii pipae doko nyepelyamino. Dupame kaitinya tae Goteme mee maingi dupa nyepaminopa Oli Sipitisa doko dupa-kisa katapelyamo.

⁵Dupame Gotenya pii doko makande petala etete epe lamo lao masilyamino. Dupame Gotenya gii epe maitakao ipatamo dokonya pupu lapae doko masetelyamino.

⁶Lombapae sepala Gote maita mailyamino endakali dupame dee pilyoo ipao mona kapilyetami kaitini nasilyamo. Mana dutupame dupa tangeme Gote Ikiningi doko lamba lao deaka ita pokonya pyao yukuilyamino.

⁷Paa longosa aiyuu epelyamopa yuumi aiyuu doko nyingi. Yuu dokonya ee pokelyamino endakali dupa nisoo nee auu pilyamo doko, Goteme yuu doko auu pisilyamo doko mambele auu pingi.

⁸Dopaka doko, yuu dokome lyiki akipi tata tata dupa manditamo kandao doko, yuu doko koo. Doko, Gotenya enombasa koyalanya pitamosana tenda itateme tata.

⁹Mona setenge paluma, indupa naimame dopa lelyamanoaka doko, Goteme nyakama pyoo nyeta epe doko nyakama-kisa silyamo lao naimame masetelyamano.

¹⁰Gote baa tolatae dokomena nyakamame opale pilyamino dupa kame sala nayata. Nyakamame Gotenya endakali dupa nisalanya opale piamino dupa indupa apata pilyaminoaka dokome, nyakamanya Gote auu kaenge doko laitaka pilyamino dupa Goteme kame sala naelyamoaka.

¹¹Dokopa nyakama mendai mendai lao dokome dopaka pyoo masoo malisilyamino Gote doko kyoto joo masalakao masipimi laka lao masilyamano. Nyakamame dopaka pyoo katao pao gii etatamo doko nyipimi laka lao masilyamano.

¹²Dopana, nyakama maka nakaenya, Gote lao masoo minao yapa maka nakayao Goteme baanya wane dupa maitona leamo dupa nyingima endakali dupanya mana watao minalapape.

¹³Wamba Goteme Apotakame maitona leamo dokopa lao pituu, “Pii doko kiningi etete lelyona,” lea-pyaa. Tenge doko endakali mende Gotenya alyasale joo nakalyamo dokonya baame baa tangenya kenge doko lao etete kiningi lelyona lea-pyaa.

¹⁴Baame lao pituu, “Nambame etete kiningi pii lelyona, nambame emba etete auu pisetala embanya mandipaenya mandipae dupa minao etete longo injisetona,” lea-pyaa.

¹⁵Dopa leamopa Apotakameme yapa maka nakayao katao Goteme maitona leamo dutupa pitaka maitakao nyia-pyaa.

¹⁶Endakali dupame nyakamanya alyasale mendenya kenge doko lao kiningi etetena lao langalu miningima. Dopa petala kiningi etetena lao langalu minilyami dokome endakali dupanya pii doko angi jetala pii atete pingi doko lao etasingima.

¹⁷Goteme apata dopa piamo doko, endakali dupame baame pitona latae doko kapa pao aloo napingi lamo lao kandokondape pina lao baame kiningi etete lelyona lea-pyaa. Baame maitona leamo doko nyetamino endakali dupa laitaka pyokondape pyaanya dopa pia-pyaa.

¹⁸Pii lapoma dolapo kapa pao aloo pyowapi dee Goteme sambo lawapi napita. Pii lapoma dolapome naima Gotepa awapa auu pyoo katatama endakali dupanya mona minao kyoto jetakala Goteme naimanya depa lekeamo dupa masalakao masoo malisoo kalyepa lenge.

¹⁹Naimame masoo malisilyamano doko naimanya lete katenge kende jepae epe kyoto naima anjetae kalyamo doko. Kende doko anda palo etete epe andakote lapalapa andake yukuotae dokonya maitakaita puu pao patae.

²⁰Jisasame naima nisalanya palo dokonya baa wambao pea-pyaa. Baa pitisa mupa Melekisendeke kateamo kombe dokonya katawaka kalyamo.