Iosua 10:6-37

⁶E huriki a bakovi o Gibeon ri talo rike a ngava lakea ne Iosua na mada o Gilgal, ri ta maea, “E huriki a hariki ne Amor na maka tanga na lolo, ri vadili vapopo ri valai pali ri gi vaubi turane mia. O valai malaviriri o tuhori mia, naha ni lohopile mia.”

⁷E Iosua i longoa a ngava iea, i pesi rike turana a tara na vabinga vona, turana e huriki a bakovi hateka na maheto vona. Ri pe e Gilgal ri vano ri gi tuhori e huriki a Gibeon.

⁸E BAKOVI DAGI i taki e Iosua i ta maea, “Naha ni mangenge vona e huriki nga. A habi ria pali na limamu. I uka tara viri ge rangi mua.”

⁹E Iosua turane huriki a tara na nugumaheto vona ri laho na rodo, ri vano ri bele o Amor. E huriki a Amor ri turutu ne ria, lakea e huriki a Israel ri vakatubu a vabinga.

¹⁰Na tahuna e huriki a Amor ri matai e huriki a tara na nugumaheto ne Israel ri valai, e BAKOVI DAGI i rata ria ri mangenge, i vakaviliha a niluhoi ne ria. Lakea e huriki a Israel ri ratapile e huriki a Amor iea o Gibeon, ri valili puru ne ria na dala tabukoi na tanga e Bet-Horon. Ri ratapile e huriki a Amor i puru lakea, i harena na tanga e Aseka e Makeda.

¹¹Na tahuna e huriki a Amor ri ha ramaia a dala na lolo i raga o Bet-Horon, e BAKOVI DAGI i vakaboru a vala-kedo, i padimate e huriki a Amor, i vano i harena o Aseka. E huriki ri mate na vala-kedo i kupo hateka na viri e huriki a Israel ri rabalaki na bainat.

¹²Na parava iea e BAKOVI DAGI i tuhori e huriki a Israel ri ratapile e huriki a Amor. E Iosua i vasileki ne BAKOVI DAGI na matane huriki a Israel i ta maea, “Ioe a haro o pesi polomeli ne Gibeon. Ioe a keva o pesi polotano na maloku ne Aialon.”

¹³Lakea a haro i tabuli mavonga, a keva tara i uka ma i rolo, i harena ne huriki a Israel ri rangi e huriki a pile. A haro i uka ma i rolo malaviriri. I tabuli mavonga na hunu i manga a parava i taku. A nuverei na maki iea ni here na puhu ne Iasar.

¹⁴I paru hosi i valai i harena mona i uka tara parava ge manga a parava iea. Ra maki iea i bele, a vuhuna e BAKOVI DAGI i longototoa a bakovi i ala taku, i tuhori e huriki a Israel na vabinga.

¹⁵Muri e Iosua turane huriki a tara na nugumaheto vona ri hamule lakea na mada ne ria o Gilgal.

¹⁶Pali re huriki a hariki nga ala lima ri ha, ri kapiloho na babe tara tabukoi na tanga e Makeda.

¹⁷I ranga e huriki a bakovi ri matai ria ri vakalongo e Iosua na hini ri kapiloho vona.

¹⁸Lakea e Iosua i taki e huriki a tara na nugumaheto vona i ta maea, “Mu kule a maka kedo dagi nga, mu tukaria a matana babe, mu ru ranga tagari ri gi matakaria.

¹⁹Pali naha ni made tavula vona a hini nga. Mu ramai e huriki a pile mu vaubi turane ria. Naha ni matataro ria ri gi vano ri gi bele na tanga ne ria, a vuhuna e BAKOVI DAGI a Vure ne hita i taki pali bara si rangi ria.”

²⁰E Iosua turane huriki a Israel ri valili ne ria, ri rabalaki e huriki ala kupo. Pali i ranga ri ha, ri kapiloho na tanga ne ria.

²¹Muri e huriki a tara na nugumaheto ri hamule lakea ne Iosua na mada e Makeda. I uka tara ne ria ge bole a vuranga. Muri e huriki a tahotanga o Kenan i uka ma ri ta hale tabu ne huriki a Israel.

²²Muri e Iosua i ta maea, “Mu talea a matana babe, mu tuli valai nau ra hariki nga ala lima.”

²³Ri vano ri tuli valai ra hariki o Ierusalem, o Hebron, o Iarmut, o Lakis, o Eklon.

²⁴Na tahuna e huriki ri bole lakea ne Iosua a hariki nga, e Iosua i gale palupu e huriki a Israel, i taki e huriki a ubu na tara i ta maea, “Mu valai mu pahatata a lohona a hariki nga.” Lakea ri pagitala valai, ri pahatata a lohone ria.

²⁵Lakea e Iosua i taki e huriki a Israel i ta maea, “Naha ni mangenge, naha ni loho paepae. Mu pesi tora, a vuhuna e BAKOVI DAGI bara i rata maea kunana e huriki a pile ne mua.”

²⁶Muri e Iosua i rabalaki e huriki a hariki nga, i vakatavore ria na kai i lima. Ri tavore mavonga i harena na haro i rolo.

²⁷Na malunga liu, e Iosua i taki e huriki a bakovi ri bole a podane ria, ri voro dili na babe ri kapiloho vona muga. Ri bole a maka kedo dagi ri kavitagua a matana babe. Ra maka kedo nga ri tababana vonga.

²⁸Na parava iea kunana e Iosua i bolea a tanga e Makeda, i nugutatea a hariki vona. I rabalaki lobo e huriki a tahotanga, i uka tara viri ge mahuri. A naro i rata virihi a hariki o Ieriko vona, i rata virihi tabua na hariki o Makeda.

²⁹Muri ne ria ri bolea a tanga e Makeda, e Iosua turana e huriki a Israel, ri pe a hini ngi ri lakea na tanga e Lipna, ri vakatubu a vabinga vonga.

³⁰E BAKOVI DAGI i tuhori ria, ri mulangi na vabinga ri bolea a tanga, ri tangotatea a hariki vona. Lakea e Iosua i rabalaki lobo e huriki a tahotanga, i uka tara viri ge mahuri. I ratea na hariki iea a naro i rata virihi a hariki o Ieriko vona.

³¹Muri e Iosua turane huriki a Israel ri pea e Lipna, ri lakea o Lakis. Lakea i pesi haluia, i ratea vonga a vabinga.

³²E BAKOVI DAGI i tuhori ria, lakea na parava muri ri mulangi na vabinga, ri bolea e Lakis. E Iosua i uka ma i matataroa tara viri ge mahuri. I rabalaki lobo e huriki a tahotanga, i manga a naro i rata virihi e huriki a Lipna.

³³Muri e Horam a hariki na tanga e Geser, i valai ge kori e huriki a Lakis. Pali e Iosua i rangi tabua na vabinga turane huriki a tara vona. E Iosua i uka ma i matataroa tara viri ge mahuri. I rabalaki lobo e huriki.

³⁴Muri e Iosua turane huriki a Israel ri pe e Lakis, ri lakea o Eklon. Ri pesi haluia a tanga iea, ri vaubi ne huriki a Eklon.

³⁵Ri bolea na parava iea kunana a tanga e Eklon. E Iosua i rabalaki lobo e huriki a tahona i manga a hini i rata o Lakis.

³⁶Muri e Iosua turane huriki a Israel ri pea e Eklon ri lakea o Hebron, ri vaubi ne huriki a Hebron.

³⁷Ri bolea a tanga iea, ri rabalakia a hariki vona, turana e huriki a tahotanga, e huriki na maka tanga ri pesi tabukoi vonga. E Iosua i ratapile hatekea e Hebron i manga a hini i rata virihi e Eklon, i uka tara viri ge mahuri.