IOHANNEM 8:1-11

¹Jesus autem perrexit in montem Oliveti:

²et diluculo iterum venit in templum, et omnis populus venit ad eum, et sedens docebat eos.

³Adducunt autem scribæ et pharisæi mulierem in adulterio deprehensam: et statuerunt eam in medio,

⁴et dixerunt ei: Magister, hæc mulier modo deprehensa est in adulterio.

⁵In lege autem Moyses mandavit nobis hujusmodi lapidare. Tu ergo quid dicis?

⁶Hoc autem dicebant tentantes eum, ut possent accusare eum. Jesus autem inclinans se deorsum, digito scribebat in terra.

⁷Cum ergo perseverarent interrogantes eum, erexit se, et dixit eis: Qui sine peccato est vestrum, primus in illam lapidem mittat.

⁸Et iterum se inclinans, scribebat in terra.

⁹Audientes autem unus post unum exibant, incipientes a senioribus: et remansit solus Jesus, et mulier in medio stans.

¹⁰Erigens autem se Jesus, dixit ei: Mulier, ubi sunt qui te accusabant? nemo te condemnavit?

¹¹Quæ dixit: Nemo, Domine. Dixit autem Jesus: Nec ego te condemnabo: vade, et jam amplius noli peccare.