Jon 8:1-11

¹Arile, Jises le ari udu, ano iy edek iu ili bwele-e mandrei ari iri aloh mandrei ta Olip.

²Udu mandraben ma wahun iy edek eme hamon eme andri ili bolo kowah ta asiu tinan ta Kindrei ja. Iri badih ma mwan ame hawen ja. Jises eme manyah ma iy leheya iri.

³Eme iri lau ta leheya kandriyen malen ta Moses, ma hawe iri Parasi, andrei badih ari eme, atehei iy ales udu mada Jises hawe iri lau marakon. Iri anya iy amekes karei.

⁴Iri ame asehek i ta Jises i buku doh, “Ndramak ta leheya, ahi anyolom iy badih kede-eh amekes karei le badeh, eme ahi andrei iy eme dah.

⁵Kandriyen malen ta Moses mene batanau taha badeh, i buku are badih, iy amekes karei i buku doh, ahi kandrei bek korowei iy kimek ki-iu. Abo, ou kameh asehek i buku sah handru?”

⁶Iri amekes sahou i buku doh anya kawendreya Jises kili ta mada sahou. Arile Jises aluh i andri iy atorou lakou na kandro minen in bada munyak.

⁷Iri ndremenya Jises kahis le. Ano iy suri iy ere loken ma iy asehek sahou ili tiri i buku doh, “Ya, are lau handru udu hawe aha kada-ah, iy bamekes se karei bwe-en? Iy kandrei bek, iy korowei i badih kede-eh.”

⁸Jises asehek sahou ano iy aluh ili andri ja. Iy atorou lakou na kandro minen in bada ndren ja.

⁹Iri marakon anuhun sahou doh badeh, ma iri asilah san tiri ta atobwak. Iri asoh ari ari. Iri lau alon adek au ma bwena. Ano iri rayah ja an hamon tiri. Jises le ari erah udu, hawe iy badih nane ales udu batalan.

¹⁰Jises eme suri iy ere loken ma iy ndremenya iy i buku doh, “Badih den? Iri lau marakon nane ndraheh? Ari tiri batehei ou bala ta mada sahou bwai?”

¹¹Iy badih nane dah anya, “Bo-oh! Ndramak tinan.” Ano Jises asehek sahou i tan, “Jo ale batehei ou bala ta mada sahou bwe. Ou au ai. Arile, ou sala samekes karei ja ai.”