Ioanes 5:7-30

⁷Lakea a bakovi i koli, i ta maea, “Bakovi dagi, i uka tara viri ge tuhori iau ge ru puru iau na naru na tahuna ni laba. Na tahuna a toni ni puru na naru a viri tara bara i puru muga nau.”

⁸Muri e Isu i takia, i ta maea, “O pesi rike! O bole rike a moke vomu, o laho.”

⁹I malaviriri kunana i lobo liu a gilanga vona. I bole rike a moke vona i laho. A parava iea, a Parava Nimalo.

¹⁰Lakea na tahuna e huriki a Iuda ri masia i kalohoa a moke vona, ri takia, “A Parava Nimalo mona. A vinara i taki naha ni kaloho a moke vomu na parava iea.”

¹¹Lakea i koli, i ta maea, “Ra bakovi i vakamahuri iau, i taki iau ga bole rike a moke nau, ga laho.”

¹²Lakea ri nanea, “E rei a bakovi i taki ioe go bole rike a moke vomu, go laho?”

¹³Pali i uka ma i lohoka vona e rei a viri i vakamahuria, a vuhuna na tahuna e Isu i vakamahuria pali, i laho dili na kurukurune huriki, i vano.

¹⁴Muri e Isu i matavisia na roho na Vure, i takia, “O longo valai, ngane o mahuri pali. Naha ni rata tabu a naro hale, ma ge bele tabu vomu a vuranga dagi hateka.”

¹⁵Muri a bakovi iea i pea a roho na Vure, i vano i vakalongo e huriki a Iuda ne Isu i vakamahuri ia.

¹⁶Lakea e huriki a Iuda ri tahatea e Isu a vuhuna i rata a maki nga na Parava Nimalo.

¹⁷Pali e Isu i koli, i ta maea, “E Tata i leho vakaroro i valai i harena mona. Iau tara a leho.”

¹⁸Na ngava iea kunana e huriki a Iuda ri rura hateka ni matakana a dala ri gi rabalakia e Isu. I uka ma ri ngaru ni rabalakia na hini i longotaro a vinara na Parava Nimalo kunana. Ri ngaru ni rabalakia na hini i galea a Vure e Tamana, i rata ia i palupulupu turana Vure.

¹⁹Lakea e Isu i koli mule ria, i ta maea, “A taki muholi mua, iau, a Tuna Vure, i uka ma ga rata kikeri a maki. Iau a rata kunana a maki a matai e Tata i rata, a vuhuna a maki e Tata i rata, iau tara a rata,

²⁰a vuhuna e Tata i ngaru iau, iau e Tuna. I vakasiri iau vona a maki lobo i rata. I muholi, muri e Tata bara i vakasiri iau na maka maki i dagi na maka nivakasiri a rata pali, lakea bara mu ngapa.

²¹I manga kunana e Tata i vakamahuri mule e huriki ri mate. Iau tara a habi a nimahuri ne huriki na ningaru nau kunana.

²²E Tata i uka ma i pelekado e huriki. I habi nau a leho ni pelekado e huriki.

²³Lakea, e huriki lobo ri gi togo iau i manga a hini ri togoa e Tata. A viri i uka ma i togo iau, i uka ma i togoa e Tata, ra i rudu iau a valai.

²⁴“A taki muholi mua, e huriki ri longo mai a ngavagu, ri luhoi tora a viri i rudu iau a valai, bara ri bole a nimahuri vakaroro. A Vure i uka ma ge pelekado ria, a vuhuna ri pea pali a matenga, ri bole a nimahuri.

²⁵A taki muholi mua, a parava bara i valai, ngane i valai pali, e huriki ri mate ri gi longoa a lohona Tuna Vure. Lakea e huriki ri longoa, bara ri mahuri.

²⁶E Tata ia a vuhuna nimahuri, lakea i ratea e Tuna tara, ia a vuhuna nimahuri.

²⁷E Tata i habi a nitora nau ga pelekado e huriki, a vuhuna iau a Tuna Bakovi.

²⁸Naha ni turutu vona a ngava nau, a vuhuna a parava ge valai na tahuna e huriki ri mate pali ri gi longoa a lohogu,

²⁹ri gi pesi rike mule na matenga. E huriki ri rata a naro kamumu bara ri mahuri mule, ri bole a nimahuri. Pali e huriki ri rata a naro hale bara ri mahuri mule, ri bole a mapana naro hale ne ria.

³⁰“Iau a keri ni rata kikeri a maki. A pele­kado a viri, i muri mai kunana a ngava a longo ne Tata. A rabugu ni pele­kado i malamala a vuhuna i uka ma a muri mai a ningaru nau. A muri mai kunana a ningaru ne Tata, ra i rudu iau a valai.