Ioanes 5:20-42

²⁰a vuhuna e Tata i ngaru iau, iau e Tuna. I vakasiri iau vona a maki lobo i rata. I muholi, muri e Tata bara i vakasiri iau na maka maki i dagi na maka nivakasiri a rata pali, lakea bara mu ngapa.

²¹I manga kunana e Tata i vakamahuri mule e huriki ri mate. Iau tara a habi a nimahuri ne huriki na ningaru nau kunana.

²²E Tata i uka ma i pelekado e huriki. I habi nau a leho ni pelekado e huriki.

²³Lakea, e huriki lobo ri gi togo iau i manga a hini ri togoa e Tata. A viri i uka ma i togo iau, i uka ma i togoa e Tata, ra i rudu iau a valai.

²⁴“A taki muholi mua, e huriki ri longo mai a ngavagu, ri luhoi tora a viri i rudu iau a valai, bara ri bole a nimahuri vakaroro. A Vure i uka ma ge pelekado ria, a vuhuna ri pea pali a matenga, ri bole a nimahuri.

²⁵A taki muholi mua, a parava bara i valai, ngane i valai pali, e huriki ri mate ri gi longoa a lohona Tuna Vure. Lakea e huriki ri longoa, bara ri mahuri.

²⁶E Tata ia a vuhuna nimahuri, lakea i ratea e Tuna tara, ia a vuhuna nimahuri.

²⁷E Tata i habi a nitora nau ga pelekado e huriki, a vuhuna iau a Tuna Bakovi.

²⁸Naha ni turutu vona a ngava nau, a vuhuna a parava ge valai na tahuna e huriki ri mate pali ri gi longoa a lohogu,

²⁹ri gi pesi rike mule na matenga. E huriki ri rata a naro kamumu bara ri mahuri mule, ri bole a nimahuri. Pali e huriki ri rata a naro hale bara ri mahuri mule, ri bole a mapana naro hale ne ria.

³⁰“Iau a keri ni rata kikeri a maki. A pele­kado a viri, i muri mai kunana a ngava a longo ne Tata. A rabugu ni pele­kado i malamala a vuhuna i uka ma a muri mai a ningaru nau. A muri mai kunana a ningaru ne Tata, ra i rudu iau a valai.

³¹“Iau kikeri bara ta ne nau, a ngavagu bara i maraha.

³²A viri tara i taki e huriki ne nau. Pali a ngava i taki a lohoka vona i muholi.

³³Hosi mu rudu e huriki ri lakea ne Ioanes, ri nanea nau. Lakea e Ioanes i vakalongo mua vona a ngava muholi.

³⁴Iau i uka ma a ngarua tara ngavana bakovi tara ge vakatorea a ngavagu. Pali a vakalohoka tabu mua na ngavane Ioanes, a Vure ge korimule mua.

³⁵E Ioanes ia a nipara i vakapalala a hini, lakea mu ngaru ni vivi vona a nipara vona na parava popote kunana.

³⁶“Pali iau a tahoka a ngava i kaneka hateka na ngavane Ioanes. A leho e Tata i habia nau ga vakaloboa, ngane a rata. Ra leho iea, i vakasiri e Tata i rudu iau a valai.

³⁷Pali e Tata ra i rudu iau a valai, ia tara i ta muholi ne huriki ne nau pali. I uka tara viri ne mua ge longo a lohona o ge matai a matana.

³⁸A nitana, tara, i uka ma mu longo maia, a vuhuna i uka ma mu luhoi tora a viri a Vure i rudua i valai.

³⁹Mu gi vakaroro a Hinere, a vuhuna mu luhoi ta ge habi a nimahuri vakaroro ne mua. A maka ngava na Hinere i vakalongo mua ne nau,

⁴⁰pali mu koi ni valai nau mu gu bole a nimahuri.

⁴¹“Iau i uka ma a ngaru e huriki a bakovi ri gi kavurike iau.

⁴²Pali iau a lohoka ne mua, i uka ma mu ngarua a Vure na hatene mua.